Shillong, Naiwieng 14 : Ka Liang Pyrshah Congress kan sa shim rai ia kaei ka ba kan leh haba pynshongnongrim ia ka rai jong u Lamphang ka Iingdorbar Thomas A Sangma halor ka mudui ban pynduh noh ia ka jinglong MLA ia ki 3 ngut ki MLA ka party ba kyntiap sha ka National People’s Party (NPP).
Haba iakren bad ki nongthoh khubor, u Nongialam ka Congress bad Chief Whip ka Liang Pyrshah Bah Ronnie V Lyngdoh ula ong “ Kane ka kam ka dang sah bad u Lamphang. Mynta u Lamphang un dang ban shim ia ka rai jong u. Lada u Lamphang ula ai ia ka rai, ngin sa shim pat ia ka rai jong ngi ia kaei kaba ngi dei ban leh”.
Haba kylli, u Bah Ronnie ula ong “Kiei kiei baroh ki shong ha ka rai u Lamphang. Mynta ngim pat nang shim rai katba u Lat um pat pynmih ia ka hukum”.
Une u Nongialam ka Congress ula pyntip ba ka party kan sa phah shen ia ka shithi pynkynmaw ia u Lamphang ba un pynmih noh ia ka hukum halor kane ka kam.
“Ngin sa pynkynmaw ia u (Lamphang) bad kyrpad ia u ban ai rain oh. Ngin ia ap ia ka rai jong u namar lehse u dang iakren ia ki stad ain bad hadien un sa shim ia ka rai” ula bynrap.
Ka congress kala buh artylli ki jingujor-kawei pyrshah ia ki arngut ki MLA ba shah sospon- Bah Charles Marngar (Mawhati) bad Gabriel Wahlang (Nongstoin) bad kawei pat ka long pyrshah ia u Dr Celestine Lyngdoh (Umsning)-hadien ba kila leit iasoh sha ka NPP ha ka 19 tarik Nailar.
.){kind=link}