Shillong, Nailur 01: U President ka Meghalaya Pradesh Congress Committee (MPCC) ma Vincent H Pala hynne ka sngi palei ula ong ba ka shong ha ka High Command ban rai la yn weng noh ne em ia ka hukum sospon pyrshah ia ki 5 ngut ki MLA.
U Ma Vincent ula ong ba kam shong satia ha ka bor jong u ban shim ia kane ka rai.
Hynrei ula ong ruh ba ym pat shym la don uwei/iwei na ki MLA kiba la wan iakren bad kyrpad ia ka party ba kan weng noh ia kane ka hukum sospon.
Une u MP ka Shillong ula bynrap ba wat lada ki kwah ban iakhun biang na ka ticket jong ka party, kine ki MLA kin hap ban iakren bad ka High Command jong ka Party kumba ki ju leh. “Ngin ym tuklar satia ia kane ka kam” ula ong.
Kane ka jingkren jong u kala mih hadien ba u MLA ka West Shillong Bah Mohendro Rapsang dang shen ula ong ba ka Congress ruh ka dang ap ia u ban iakhun na ka ticket jong ka party haba kynthoh ia ki jingiakren a u thmu ban pyniasoh noh sha ka BJP. Hynrei u Bah Rapsang ula pynpaw ba u kham noh sha ka NPP.
Ha ka 27 tarik Iaiong, ka Congress kala sospon ia ki 5 ngut ki MLA haduh lai snem namar ka jingiaid pyrshah ia ka party hadien ba ki leit kyrshan ia ka Sorkar Meghalaya Democratic Alliance (MDA) ba kyrshan da ka BJP.
Kine ki MLA ba shah sospon ki kynthup ia I kong Ampareen Lyngdoh (East Shillong), Mayralborn Syiem (Nongpoh), Kimfa S Marbaniang (Rambrai-Jyrngam) and PT Sawkmie (Mawlai) bad Bah Mohendro Rapsang (West Shillong).
