La pynsangeh shuwa ia ka Skywalk project ha Nongbah
Shillong, Rymphang 07 : U Myntri Rangbah ka Jylla ula pynpaw ba u don ia ka jingangnud ban pynkylla ia ka Shillong kum ka ‘Nongbah ki nongiaid kjat suda’ (Walkable City) haba pyntip ba ka Sorkar Jylla kala rai ban pynsangeh shuwa ia ka jingshna ia ka Skywalk hapoh ka Nongbah.
Ka project Skywalk ka dei kaba la tyrwa kum shibynta na ki sienjam ban weng ia ka jingkhapngiah jong ka Nongbah.
“Ngi la don jingthmu ban buh ia ka skywalk ha kawei na ki jaka hynrei la ai jingmut ia ngi ban nym pat pyntrei ia ka kam namar kan nang pynjur shuh shuh ia ka jingdheng kali katba ka kam ka dang iaid” ong u Myntri Rangbah haba kren ha ka jingialang ba long hynne ka sngi Balang.
“Katba ngim pat ioh ia ki lad ki lynti ban pynieng ia ki kali ban pynduna ia ka jingkhapngiah, ka jingshna ia ka skywalk, ha kane ka por hi la hap ban pynsangeh shuwa namar ka jingdheng kali ha kine ki shisnem shiteng ban wan kan sa nang jur lada ngi sdang noh ia ka jingtei (skywalk) ha kine ki jaka bala ithuh” ula ong.
U Myntri Rangbah ula pynpaw ia ka jingangnud ban pynkylla ia ka Shillong kum ka “Nongbah ki nongiaid kjat suda” bad ong “Nga ngeit ba ka Shillong ka lah ban long ka Nongbah ki nongiaid kjat namar ki shnong ki thaw kim dei kiba jngai bad kumta lada ngi don ia ki lynti iaid kjat kiba lah ban shakri ia ki paidbah ka Jylla, nga tharai bun ki paidbah ka Shillong kin jied ban pynieng iala ki kali ha ki jaka pynieng kali bad sa iaid kjat noh”.
U Conrad ula pyntip ba ka Sorkar kala dep shna map kumba 15 Km haduh 18 Km ha baroh kawei ka Nongbah Shillong khnang ban ioh pyniasoh ia ki lynti iaid kjat. “Nga la khot ia ki shad ki jhad bad kum kine kiei kiei kila jia mynta” ula bynrap.
Ha kajuh ka por, u Myntri Rangbah ula pyntip ba ka Sorkar kala don jingthmu ruh ban nang pynbun ia ki jaka pynieng kali, ki ban ai jaka lem ia ki nongshong dukan madan, ban weng ia jingkhapngiah ka nongbah. Kine kin sa mih ha ki jaka jong ka Sorkar kiba la shu iehshrah la bun bun snem.
Nalor kane, u Myntri Rangbah ula ong ba ka Sorkar kala shem ba ka jingkhapngiah ha ki thain Police Bazaar bad Iewduh kala jia na ka jingbym lah pyniaid bha ia ki bos bad ki taxi bad kane ruh ka dei ka jingtynjuh kaba khraw namar ba kam don satia kiwei pat ki jaka ia ki bos bad ki taxi ba kin pynieng.
“Kumta , ka lynti hi ban lah weng ia ki jingkhapngiah ha kine ki jaka ka dei tang ban wanrah ia ki jaka kaba ki bos bad ki taxi ki lah ban ieng bad ap briew” ula bynrap.
U pyntip ba ka Sorkar kala iakren mynta bad ka Sorkar India ban pynphai noh ia ki jaka ba long trai da ka Contonment Board sha ka Sorkar bad ia kine ki jaka yn pynkylla kum ki parking zone bad waiting zone ia ki bos bad ki taxi.
