Shillong, Naiwieng 02: Ka sorkar jylla kala buh iaka thong ba ki nongialehkai ka jylla kin ioh rung haka Olympic 2032 bad kala trei tyngeh ban ioh pynurlong ia katei ka jingangnud.
Katei kadei ka khubor kaba la pynpaw da u Myntri Rangbah ka jylla u Conrad K Sangma, ha ka Video kaba long ka kyrwoh naka bynta ka 2nd North East Olympic Games 2022, ia kaba yn pynlong da ka jylla Meghalaya mynta u bnai.
“Kane kadei ka lympung ialehkai kaba heh bha kaba ka jylla kan pynlong bad ka long kaba iahap bha ban pynlong khamtam haba ka Meghalaya ka rakhe iaka jingdap 50 snem jongka jingioh iala ka jong ka jylla” la ong u Conrad bad ka pdiang sngewbha ia palat 2000 ngut tam ki nongialehkai kiban wan iashimbynta ha katei ka lympung ialehkai ha kine ki sngi ban wan.
U Myntri Rangbah uba long ruh u Chief Patron jong katei ka lympung ialehkai, ula pynpaw baka sorkar kala ai jingiarap ia ki nongialehkai kiba la jop ha ki jingiakob ki bapher bad ka jingai khusnam ia ki ka long ban pynshlur ia ki ba kin nang trei shitom shuh shuh, ha kaba kiba ioh iaka takma ksiar haki jingiakob ha ka jylla kin ioh pdiang T.10,000 bad haduh T.75 Lak na ka bynta kito kiba jop haka Olympic.
“Ha kine ki 4snem shiteng, ka sorkar jylla kala pyniaid shakhmat ban wanrah ia ki jingkylla haka rukom phaikhmat ha ka liang ialehkai na kaba ka ju long mynshwa, da kaba shimkhia bha bad ban ithuh ia ki nongialehkai kiba don sap ha ka jingjop ka jongki, da kaba pynkiew ia ka bhah tyngka ha kaban tei ia ki jaka ialehkai, ban ai jingiarap daka pisa ia ki kynhun ialehkai ban pynlong ia ki jingiakob bad ban phah ia ki nongialehkai ban leit iakhun ha ki jingiakob kiba long shabar ka jylla bad ban ithuh thikna iaka sap ka phong jong ki nongialehkai” ong u Conrad Sangma.
Ula ong, watla ka jingangnud jong ka sorkar ban sei ia ki nongialehkai na ka jylla ha ka Olympic 2032 ka long kaba heh, u Myntri Rangbah ula ong, “Ka long kaba donkam ia baroh ba kin don ia ka jingangnud kaba heh bad ka sorkar jylla ka don ban plie lad plie lynti ia ki nongialehkai ban kin pynurlong iaka thongka jongki”.
Ki kam ki jam kila iaid shaid shaid ha ka jingpynkhreh ban pynlong iaka 2nd North East Olympic Games 2022, kaban kynthup ia ki 18 tylli ki jait jingialehkai ki bapher bapher kiba iaid beit.
Mynne ka sngi, u Co-Chairman ka NEOG 2022 uba long ruh u Commissioner and Secretary jong ka sorkar jylla u Dr Vijay Kumar ula leit ban jurip ia ki jaka kiban pynlong ia ki jingialehkai hapoh ka nongbah Shillong ha kaba la iadonlang u Secretary jong ka sorkar jylla u Bah Cyril VD Diengdoh IAS, u Director ka tnad Sports and Youth Affairs u Shivansh Awasthi bad kiwei kiwei.
Kila don ki jaka ialehkai kiba la dep ban pynbha kum ka jaka ialehkai Football jong ka MFA kaba don ha Polo Ground, ha kaba la pynieng ia ki Floodlights bad ki jaka shong ba shipor ia ki nongpeitkai football.
Nalor kane, ka tnad Sports and Youth Affairs kala pynrungkam da ki spah ngut ki samla ban long kum ki Volunteer ban pynlong ia katei ka lympung iakob kaba jop naka bynta ban rejistar ia ki nongialehkai, ban pynbiang iaka jaka sah, ki kali bad ka bam bad kiwei kiwei, kumta ka sorkar jylla ryngkat bad ka Meghalaya State Olympic Association kila trei baroh 24 kynta.
