Shillong, Risaw 18 : U Myntri Rangbah ka Jylla Conrad K Sangma ha ka sngi Thohdieng ula pyntip ba ka Sorkar Jylla kan sa pyrkhat ia ki lad ki lynti ban iaid ialap bad pynphriang ia ki jingtip shaphang ka juk “Meghalayan Age”.
U Myntri Rangbah ula pynbna ia kane ha ka jingialang iasyllok bad ki nongioh bynta jong ka CM-ELEVATE bad FOCUS, kaba long ha Shillong-kaba la iashimbynta ruh lyngba ka kor video ba leh Online na ki District bad ki Block bapher bapher jong ka Jylla.
Ia kane ka jingthmu la ai jingmut da uwei u nongsengkam na ka shnong Mawmluh, East Khasi Hills, uba la ong ba ka juk “Meghalayan Age” ka dei kaba la iakren bha da ki Geologist ha kylleng ki ri ka Pyrthei bad kan bhah shibun ba ki briew kin tip shaphang jong ka.
Ki 4200 snem mynshuwa ki dei kiba la ithuh kum ka juk Meghalayan Age, kaba pyni ia ka por kaba kyrpang ha ka histori jong ka Pyrthei. Ki nongwad bniah kila kdew ia ka jingsdang jong kane ka juk sha ka jingtyrkhong kaba jur kaba pynjot ia ki jaka ba shong ki nongshongshnong kiba la kiew shakhmat ha ki por hyndai (ancient civilization).
U Myntri Rangbah ula tyrwa ia shibun ki sienjam ban pynsngewthuh paidbah, kynthup ia ka jingpynmih ia ka documentary film ka ban batai kat kum ka stad saian bala shem na ka jingtih bniah ia kaei kaba shem na ka mei ramew (geology). Kane ka phlim kan long kum ka atiar ban hikai ia ki paidbah shaphang ka jingkongsan ka geology jong ka juk Meghalayan Age.
Ha kane ka sngi, u Myntri Rangbah ula pynshai ruh halor ki skhim bapher bapher kum ka CM-ELEVATE, kaba don ia ka bynta jong ka ram, kaba la pyniasoh bad ki bank bapher bapher. Ka CM-ELEVATE ka ai ia ka grant ba kot haduh 70% jong ka pisa ban pynlut naka bynta ka project baroh kawei.
Ban iarap ia ki nongrep bad ban kyntiew ia ka rep ka riang, u Myntri Rangbah u pyntip ba ka Sorkar kala wanrah ia shibun ki prokram ba kynthup ia ka jingseng ia ki processing unit ban pynmih mar bapher bapher na ki marrep nalor ka jingtyrwa ban shna ia palat 100 tylli ki iew jong ki nongrep ha ka Jylla.
Halor ka jingaijingmut ban don ka “Agriculture Electricity Tariff” ba kyrpang ban seng ia ki karkhana ba pynmih mar na ki marrep, ula ong ba ka Sorkar kala ai jingiarap na ki skhim bapher bapher hynrei watla katta, ka Sorkar kan sa shong bishar bha ia kane ka jingai jingmut.
Ha kane ka prokram,u Myntri Rangbah ula sam ruh ia ki cheque sha ki nongioh bynta jong ka skhim FOCUS bad CM-ELEVATE. Ula pyllait paidbah ruh ia ki kali Tourism bala mang lyngba ka CM-ELEVATE.
Ia u Myntri Rangbah la synran lang da ka Myntri kam rep Kong Ampareen Lyngdoh bad Myntri ka Tnad Veterinary & Animal Husbandry Bah AL.Hek.
