Shillong, Naiwieng 12: U Myntri ka Tnad Pule Puthi Bah Lahkmen Rymbui ha ka sngi Balang ula pynpaw ba ka kam ba hakhmat eh jong ka Sorkar ka long ban pynbeit ryntih shuwa ia ki skul ha kylleng ka Jylla Meghalaya.
Haba kren sha ki lad pathai khubor, u bah Rymbui ula iathuh ia ki jingthmu bad ong “Ka thong jong ngi ka long ban pynbeit ryntih ia ki skul-ban pynthikna ba ki don ia ki nonghikai kat kum ka jingdonkam, kiba bun khynnah skul bad ki jingtei kiba paka”.
Ula bynrap “Nga kyrmen ban gin poi ha u khep ha kaba barohki skul ha Meghalaya ki don ia ki nonghikai ba donkam, ka ban plie lynti ia ki jingkylla kiba khraw”.
Haba kren halor ki jingsngewkhia ba iadei bad ki nongtrei hapoh ka Sarva Shiksha Abhiyan (SSA), u Myntri ula kular ba ka Sorkar Jylla kan pynneh ia ka skhim watla ka Sorkar Pdeng ka pynkut noh ia ka haba pynpaw “Ngin sa khmih ia kiei kiei baroh….ka Sorkar Meghalaya kan sa peit ba kane ka skhim kan bteng da ka long kumno kumno ruh”.
Haba kylli halor ka jingbei tyngka, u Bah Rymbui u la pynpaw ba ka pisa hi ka dei ka ban dang khein.
“Ngim pat poi ha u khep ban rai ba haduh katno ngi donkam ia ka pisa. Ngi dang lum jingkhein bad kyrmen ba ngin sa ioh ia ka jingkhein jingdiah ha ki khyndiat sngi ban wan” ula ong.
