Shillong, Naiwieng 12 : Ka Working President ka Congress Deborah Marak kala pynbna ha ka sngi Balang ba ka party kala pynkhreh ia ka jingwan pyniasoh ki nongialam sain pyrthei kynthup katto katne na ka Trinamool Congress (TMC), kiba la pynpaw ba ki kwah rung noh sha ka Congress.
“Ki don bun ngut, kin sa wan pyniasoh uwei hadien uwei. Kumta, ngi la pynkhreh mynta ban pdiang ia ki. Ki don katto katne ki kam ha ka sain pyrthei kaba ngi hap leh sopsop. Ynda la poi ka por, ngin sa iathuh sha phi” ong ka Deborah haba iakren bad ki nongthoh khubor ha ka sngi Balang.
Haba kylli lano ki MDC ka TMC kin wan pyniasoh sha ka Congress, kala ong “Phi tip kila don ha lynti, lehse kin sa poi noh shen”.
La ki don ki briew ka NPP ban wan pyniasoh, kala jubab “Ngim pat tip ia kata”.
U Secretary ka MPCC Bah Manuel Badwar ula kren halor ka jingpynkhreh ka Congress ia ka elekshon ban wan jong ka GHADC bad ong “Ka jingkwah u paidbah ba bun balang hi kala wan sha ngi, kaba mut ba ka Congress kan khie im biang. Kamp her haduh katno ki briew ki kynthoh ia ngi, kam pher haduh katno ki briew ki kren pyrshah ia ka party, ki paidbah kila pyni ba ki mon ia ka party”.
U Bah Badwar ula ban jur ba watla ki don bun kiba kwah ban wan iasoh, ka party kan hap ban pyndonkam ia ka jingstad.
“Kane kam mut ba baroh kin wan iasoh lane yn shah ba kin iasoh. Ngi hap ban bishar, kan shong ha ka rukom long ki briew kiba wan iasoh bad ban peit la ki dei ki khwai myntoi lane kila wan iasoh namar ba ki don ka jingngeit kaba skhem” ula ong.
, kiba la pynpaw ba ki kwah rung noh sha ka Congress.){kind=link}