Shillong, K’lyngkot 17 : U Myntri Rangbah ka Jylla Conrad K Sangma ula ong ba ka Meghalaya kala pynshlur ia ka kam ri dohkha kaba heh bha ban lah pyndap ia ka jingduna hapdeng ka jingdawa dohkha bad ka jingpynmih dohkha.
Ka Jylla ka bam kumba 28,000 haduh 30,000 metric ton ka dohkha ha ka shisnem, katba ka jingpyn mih dohkha kumba long mynta ka long 20,000 metric ton, ong u Conrad.
“Ngi la pynshlur ia ki nongri dokha ba kin ri kham bun ki dohkha bad ban shim ia ki lad jingiarap bad ki skhim” ula bynrap.
U Myntri Rangbah ula kren halor ka jingpyrshang jong ka Sorkar ban pynshlur ia ki nongsengkam shimet ba kin buh ia ki farm ri dohha kiba heh ha Jylla.
“Ngi pynshlur ia ki ban leh ia kane ha ka rukom kaba heh bha….Bun na ki nongri dohkha jong ngi ki dei kiba ri dohkha ha ki pung ba rit, kumta ngi donkam 20,30, 50 ngut ba kin wan sahkhmat bad ban seng ia ka farm kaba heh” ula ong.
U Conrad ula pynpaw ia ka jingkyrmen ba ka jingpynmih dohkha ka Jylla kan sa poi shen sha u pud ban lah pyndap hi, ka ai kamai jakpoh, bad ban ioh shalan ruh sha ka Jylla ba marjan.
“Shisien ba ngi lah tam ia ka 30,000-32,000 ha ka jingpynmih dohkha, ngin sa lah ban shalan lane ai sha ki Jylla ba marjan” ula ong.
Ka Sorkar kan pynthikna ruh ia ka jingbha ki dohkha bad ka jingshngain lyngba ka jingkhmih da ki Nongtrei ka Food Safety.
