Shillong, Nailar 11 : U Myntri Sorkar bad Nongialam ka BJP Bah AL Hek ula ban jur ia ka jingkongsan ban khanglad ia ka jingrung kyrthep ki briew ba nabar sha Jylla bad ong ba ka dei ka kamram jong ka Sorkar bad baroh ban pynthikna ia kane.
“Ka dei ka kamram jong ka Sorkar bad wat ki riew shimet ruh ban pynthikna ba ka jingrung kyrthep ki briew ba nabar kan ym jia hapoh ka Jylla Meghalaya” ong u Bah Hek haba iakren bad ki nongthoh khubor.
Haba kdew ia ka jingiohkem ba dang shen ia ki nong Bangladesh ba pyntriem ia u nongshongshnong ha khappud, u Bah Hek ula ong ba ka dei ka kamram jong ka Sorkar ban pyntip sha ki bor ka Sorkar Pdeng halor ka jingrung tuh ki briew ba nabar ka Ri.
Ula ban jur ba ka long kaba kongsan ia ka Sorkar ban shim ia ki sienjam kiba treikam bha ha kaban leh eiei halor kane ka kam.
“Ki agency bapher bapher, kynthup ki Pulit bad Border Security Force (BSF) kila trei ia ka kam ban khanglad ia ka jingrung tuh” ong u Myntri.
U Bah Hek ula pdiang sngewbha ruh ia ka jingtyrwa jong ka Sorkar ban wanrah da ka ain ba thymmai ban iada ia ka Meghalaya na ka jingwan rung kyrthep ki briew ba nabar ka Jylla.
Dang shen, u Bah Hek ula pynpaw ia ka jingsngewskhem b aka Meghalaya Residents Safety and Security Act (MRSSA) ka dei ka ain kaba biang bha ban tehlalam ia ka jingwan rung ki briew shapoh ka Jylla.
