Shillong, Lber 3: U Lat ka Jylla Phagu Chauhan hynne ka sngi thohdieng, ula khot ia ka National People’s Party (NPP), kaba don bun paid eh ha ka Iing dorbar da 26 seat, ba kan thaw ia ka Sorkar thymmai ha Jylla.
“U Lat ka Jylla ula khot ia ngi (ban thaw sorkar)” ong u Nongialam ka Parliamentary Party ba dang shu shah jied ka NPP Conrad K Sangma haba iakren bad ki nongthoh khubor hadien ba iakynduh ia u Lat ka Jylla. U Conrad ula aiti ruh ia ka shithi iehnohkam kum u Myntri Rangbah ka Jylla ha u Lat.
Submitted the letter of resignation as Chief Minister of Meghalaya to Hon’ble Governor, Sh. Shri Phagu Chauhan Ji, also staking a claim to form the new Government. pic.twitter.com/Lw1VOSzpfT
— Conrad K Sangma (@SangmaConrad) March 3, 2023
Ia u Conrad la synran da ki MLA ka NPP, ki 2 ngut, ki MLA ka BJP bah Sanbor Shullai bad Bah AL Hek bad u MLA ka Baghmara Kartush R Marak.
Kumba long mynta ka NPP ka don 29ngut ki MLA, 26 ngut ki MLA jong lajong bad ioh ia ka jingkyrshan na ki 2 ngut ki MLA ka BJP bad u MLA shimet.
U Conrad u pyntip ba ka NPP kan sa aiti noh ia ka thup kyrteng jong ki MLA mynta ka janmiet. Kat kum ka jingong jong u, kiba bun ki MLA ka NPP ki dang don ha lynti sha Shillong namar ia ka result dang shu dep pynbna hynnin ka sngi palei.
Shuwa ban leit sha Iing u Lat, ka NPP kala shong ia ka jingialang Parliamentary Party ha ryngkat ki MLA ka BJP bad u MLA shimet.
U National Vice President ka NPP bah Prestone Tynsong bad MLA ka Pynursla ula pynbna ia ka rai jong ka Party ba la jied biang ia u Conrad K Sangma kum u PP leader.
