Tura, Naiwieng 11 : U Myntri Rangbah ka Jylla Conrad K Sangma hynne ka sngi thohdieng, ula aiti ia ki kot pata sha palat 100 tylli ki Longiing ban long ki trai ia ki jaka puta hapoh ka shong Reserve Gittim, West Garo Hills.
U Myntri Rangbah ula aiti ia kine ki kot pata ha ka jingialang ai khublei bala pynlong da ki Nongshongshnong hadien ba u Chief Executive Member (CEM) ka GHADC ula aiti ia ka hok longtrai sha kine ki Longiing trai muluk kiba shong shnong ha Reserve Gittim.
Kiba la iadonlang ha kane ka sngi ki kynthup ia u Deputy Commissioner ka West Garo Hills u Swapnil Tembe, ka Rikse R Marak CEO ka Tura Development Board bad kiwei kiwei ki kynrem ki lyndan.
Ym kum sha kiwei pat ki bynta jong ka Ri India, ka Meghalaya kam don satia ia ka jingshai haba iadei bad ka hok halor ki jaka puta ha kiba bun ki jaka namar ka kam rep syrti bad ka rukom pynbeit ba iapher bha ia ki jaka puta.
Hadien ka jingioh ka Meghalaya iala ka jong ka Jylla ha u snem 1972, ki paid riewlum ha kylleng ki jaka ka Jylla kila kyrpad ban ithuh noh ia ka hok jong ki halor ki jaka puta ba ki sah. Kane kala mih na ka jingsangeh ka rep syrti, kaba dawa ba dei ban ithuh ia ka hok longtrai. Ka jingbym don ki dulir ne ki kot ki sla kala buh ha ka jingeh ban ithuh mano ba dei ki trai ba shisha ia ki jaka.
U Myntri Rangbah ula ong “Ka hok halor ka jaka ka dei kaba kongsan tam ia ka snap kyrpang jong ki paid riewlum kiba dei ki briew jong ngi. Namar kata, ka jingaiti ia ka hok longtrai ia ki jaka ki puta sha kiba dei hok ki trai ka dei kawei na ki mat treikam ba hakhmat eh. Ha kine ki saw snem shiteng ba ngi synshar, ngi la leh lut kat kaba lah ban iarap ia ki briew ha Reserve Gittim, ngi lah shim ia ki lynti ka ain ban ai ia ki pata sha ki paid riewlum ka Jylla. Ngi don jingthmu ruh ban leh kumjuh ia ki paid riewlum kiba mad ia kijuh ki jingeh ha kylleng ki jaka ka Jylla”.
U Deputy Commissioner ula ong ba ka jingpynbeit ia ka hok longtrai ia ki jaka puta ka long kaba kongsan bha. “Ha man ba ialeh shim ram, pan syrnot, ne kiwei kiwei, ki pata ki dei kiba kongsan, namar kata, ka jingpynbeit ia ki hok longtrai ia ki jaka puta ka dei kaba kongsan tam.
Ula ong ba ki don ruh kiwei ki jaka kum ha Tura ha ka Tnad Revenue jong ka Disrtrict kala pynlong ia ka jingwad bniah halor kane ka jingeh bad la bthah ia ki Nongtrei na DC Revenue bad Enforcement ba kin leh sorbe.
Ula ruh ban weng noh ia kiba bun ki jingeh bala mad da ki nongshongshnong ka thain, ki Tnad bapher bapher ba khmih ia ka jingai um, bording bad kiwei kiwei, kin sa iatreilang hapdeng jong ki.
Kawei na ki nongioh pata, ka Sharon D Sangma kala ong “Ha u 2018 u CEM ula sdang ia ka jingtohkit halor kane ka kam namar ka jingshem ia kiba bun ki jingeh na ka daw ba ki briew kim don satia ia ki pata khyndew haduh ba kim lah ban tan pipe um, bording ne wat ban applai ia ka Caste Certificate. Ngi da sngewnguh ia u CEM, CM kiba la kyrshan bad iarap ia ngi ban ioh ia kine ki para.
Kawei pat kaba ioh pata ka Remsoni Ch Marak kala bynrap “Haba ngi leit sha ki Ophis ban shim ram, la buh jingkylli ia ngi la ngi don ne em ki kot pata bad haba ngim lah ban ai, la bthah ia ki ba ngim lah ban shim ram kaba heh. Mynta ba ngi la ioh ia ki pata, ngi da sngewnguh ei ia baroh”.
