Nang pynsuk ka Sorkar ia ka rukom thungkam ha Jylla, ong u CM
Shillong, Lber 07: U Myntri Rangbah ka Jylla Conrad K Sangma ha ka sngi Palei, ula aiti ia ki shithi thungkam sha ki 425 ngut ki doktor Junior Specilist, Medical Officer bad ki Dental Surgeon, kiba la thungkam thymmai ban leit shakri ha kylleng ki jaka sumar hapoh ka Jylla.
Ka jingpdiang ia kane ka jingrung kam thymmai kine ki doktor la pynlong hapoh ka State Convention Centre, Shillong bad la pynshongkun iaka da ka Myntri ka Koit ka Khiah Dr Ampareen Lyngdoh bad u Myntri ka tnad PHE Marcuise N Marak.
Haba ai khublei ia kine ki doktor ba dang shu iohkam thymmai, u Myntri Rangbah ula kyntu ia ki ba kin trei da ka jingaiti met bad mynsiem bad da ka jingthmu ban shakri ia ka imlang sahlang.
“Ka eksamin thungkam bala pynlong da ka Sorkar ka dei kaba shai bha. Phi iadon hangne namar phi dei kiba lah bad phi dei kiba kynsai tam bad phi la leh bha ha ka eksam” ula ong.
Haba kren halor ki jingeh bad ka jingthungkam ha ki Tnad bapher bapher ka Sorkar, u Myntri Rangbah ula ong “Ngi la phiah ia ka rukom thungkam da kaba pynkha ia ka Board for Education and Health, kaba la pynsuk lut ia ka rukom thungkam. Ha ki snem bala lah, ka rukom thungkam ka dei kaba suki bha bad ha ki katto katne ki khep, ka shimpor ruh haduh hynriew snem. Ka rai ban thaw ia ka Recruitment Board la ka jong ia ka Tnad Education bad Health kala pynthikna ba ka rukom thungkam kan sted bha ha kaban pyndap ia ki kam kiba lait thylli”.
Halor ka jingpynkhlain ia ki lad ai jingsumar sukher, u Myntri Rangbah ula ong bah aba phai sha ka percentage, ka Sorkar kala khein kongsan bha ia ka koit ka khiah bad jan 8% na ka Mang tyngka ka Jylla la ai sha ka koit ka khiah. “Ka mang tyngka sha ka Tnad ka koit ka khiah ka dei kaba hehduh hapoh ka Ri, haba ngi thmu ban pynkhlain bad pynkylla lut nadong hadong ia ki kam ba iadei bad ka koit ka khiah” ula bynrap.
Ula pyntip ruh ba ka Sorkar kala thaw ia ki Administrative Housing Unit ha kylleng ki jaka ka Jylla na ka bynta ki Doktor bad kiwei kiwei, khnang ba ki jingtei kin don wat sha ki jaka ba kyndong eh jong ka Jylla ka ban pynsuk ia ki nongtrei Sorkar ba kin trei ia ki kam khlem ka jingeh.
“Ha ka jaka ban buh ia ki Hounsing Complex la la ka jong ia ki Tnad bapher bapher, ka Sorkar ka don jingthmu ban thaw ia ki Housing Complex ban ai jaka ia ki doktor, ki engineer bad kiwei ki nongtrei Sorkar hapoh kawei ka complex” ula bynrap.
U Myntri Rangbah ula ong ba nalor ki District Headquarter ki ban sa ioh ia ki Administrative Housing Complex, ka Sorkar ka don jingthmu ruh ban shna ia kum kine ki complex ha ki jaka nongkyndong na ka bynta ki doktor, ki nos bad kiwei ki nogntrei Sorkar. “Ngin ym lah ban leh noh mar mar ha baroh kawei ka Jylla hynrei ka Sorkar kala kut jingmut ban sdang ia ki jingtei da ka mission mode”.
Ula pyntip ruh ba ha kine ki khyndiat snem ban wan, ki PHC bad CHC kynthup ki Hospital ha kylleng ki jaka ka Jylla kin sa ioh noh ia ka dur ba thymmai. “Ka kam kala sdang bad hapoh kane ka samoi jong ka Sorkar, ngi dei ban lah pyndep bad pynheh ia baroh ki jingtei jong ki jaka ai jingsumar”.
Ula ong ruh ba ha kine ki khyndiat taiew ban wan, ka Sorkar kan sa pyllait sa ia ka Patient Management System hapoh ka Jylla ba kan pynsuk ha kaban peitthuh ia ki nongpang kiba leit shah sumar ha ki jaka sumar bapher bapher ka Jylla.
