Shillong, Iaiong 04: Ka tnat Public Work Department (PWD) Road Shillong Central Division kala sdang ban maramot iaka surok naduh Garoline, Laitumkhrah -surok MES ter ter shaduh Demseiniong, ka surok bah kaba iaid sha Nongmensong bad Polo.
Ki tyllong khubor ki iathuh ba ka tnat PWD naduh baka la shimti iaka surok MES, kaba dei ka surok ba khmih ki shipai, kala mang ban pynheh iaki katto katne ki bynta jong ka surok naduh Garoline Laitumkhrah sha Demseiniong.
Haba pynthikna ia kane, u Myntri Sorkar u Bah AL Hek ula iathuh ba ula dep ban iakren bad u Brigadier ka MES u ba dei ruh u Chief Engineer ka MES Shillong zone bad ula pynthikna ba ia kane ka surok la dep ban aiti shaka tnat PWD Shillong central zone.
U Bah Hek ula pyntip ba ula iakren bad u Brigadier ban ai jaka iaka PWD ba kan pynheh iaka surok MES ka ban pyniasoh haka surok bah kaba mih sha Demseiniong bad ka ba iaid sha Nongmensong bad Polo.
“Mynshawa kane ka surok ka hap hapoh ka Constituency jong nga. Hynrei hadien ka jingphiah constituency (Delimitation), kane ka surok kam hap shuh ha Pynthorumkhrah Constituency. Watla kata ruh nga sngewkhia ba kane ka surok kala jot rathai bad dei namar kane, haki 2-3 taiew mynshawa nga la thoh sha u Brigadier ka MES ban maramot ia kane ka surok” ong u Bah Hek.
U Bah Hek ula iathuh ba dang mynta ka sngi, u Brigadier ka MES ula pyntip ba ia kane ka surok la aiti shaka tnat PWD.
“Kane ka surok ka don palat 1 kilometer bad u Brigadier ka MES ula iathuh baka tnat PWD kala sdang ban maramot ia kane ka surok hynrei haba iadei bad ka jingpan jaka ban pynheh u Brigadier ula kyntu ia nga ban phah daka jingthoh namar ia kane ka bynta hap iakren shwa bad ki bor baha halor ka tnat iada Ri (Defence)” ula ong.
