Shillong, Risaw 30 : Ka New Shillong Township Development Agency, hynne ka sngi Nyngkong, kala aiti ia ka jaka ban tei ia ka National Law University (NLU) bad ka Meghalaya State Judicial Academy ha Mawpdang, Mawkhanu.
Ia kane ka jaka la aiti da u Myntri Rangbah ka Jylla Conrad K Sangma sha u Chief Justice ka Meghalaya High Court bad Chancellor ka National Law University Sanjib Banerjee ha ka jingialang kaba long ha Mawpdang, Mawkhanu.
Handed over land for the construction of the permanent campus of the National Law University, Meghalaya and the Meghalaya State Judicial Academy to Hon’ble Mr. Justice Sanjib Banerjee, Chief Justice of Meghalaya High Court at Mawpdang, Mawkhanu.
Investing in Human Capital has… pic.twitter.com/DShYqBvPPU
— Conrad K Sangma (@SangmaConrad) October 30, 2023
Haba ai jingkren, u Myntri Rangbah ka Jylla ula pynpaw ba ka Sorkar Jylla kala shai kdar halor ki jingthmu jong ka na ka bynta ka jylla bad ong ba kumba long kiwei ki Ri bala roi la par, ka Jylla ruh kala jam shakhmat ban kyntiew ia ka ioh ka kot.
“Ka jingkiew ka roi ka par ka shong eh ha ka jingdon ki briew ba tbit ban treikam bad kumta ka long kaba donkam ban sdang na kano kano ka kam bad namar kata, ka policy jong ngi kala iaid shakhmat ha kaban pynthikna ba ngi kynshew bha ha ka liang ka jingdon ki nongshongshnong ba tbit treikam kaba ngi ngeit ba ki dei ki lawei jong ka Jylla” ula ong.
U Conrad ulaong ba ka India ka dei ka Ri ki samla bad man ki samla ki dei ban noh synniang ha ka lynti kaba dei sha ka jingkiew irat jong ka Ri.
U Chief Justice Sanjib Banerjee haba ai jingkren ula ong “Ngi kwah ba kane ka University kan dei ka jaka pule kaba ngin iasam bad phi ia ki atiar bad ki rukom treikam” ula ong haba kyrmen ba kane ka skulbah hadien habud, kan nang iohi ia bun ki samla pule napoh ka Jylla.
U Chief Justice ula kyntu ruh ia baroh ba kin kyrshan ia kane ka jaka pule ba kan kiew kum ka National Law University khnang ba kan long ruh ka jaka pule ka ba lah ban sngew sarong hakhmat ka pyrthei.
Kiba la iadonlang ha kane ka sngi ki kynthup ia ka Myntri ka tnad Ain Kong Ampareen Lyngdoh bad u Myntri ka Tnad Pule Rakkam A Sangma, ki Judge ka High Court bad Vice Chancellor ka National Law University, Prof Indrahit Dube, u Secretary ka Tnad Ain Bah CV Diengdoh bad Member Secretary ka New Shillong Township Development Agency Bah E Kharmalki.
Pule lang ia kane: Weng noh ka Sorkar ia ka jingpyrrkhing African Swine Flu na 3 ki farm ri sniang
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
