Shillong, Iaiong 10: Haba shim ia ka sienjam ban pynthikna ia ka jingshakri kaba kham bha ban iakhun ia ka jingpang HIV/AIDS ha kylleng ki bynta ka Meghalaya, khamtam ha ki jaka kiba don ha kyndong eh, ka Meghalaya Legislative Assembly kala aiti ia ka kali Mahindra Bolero sha ka Meghalaya AIDS Control Society (MACS).
Ia kane ka kali la aiti ha u Dr. Wallambok Langstieh u Project Director jong ka MACS bad kiwei kiwei ki ophisar, da u Malthus S. Sangma, MCS, Additional Secretary jong ka Meghalaya Legislative Assembly uba la mihkhmat ia u Thomas A. Sangma, u Lamphang jong ka Meghalaya Legislative Assembly.
U Lamphang ula shimkhia mardor ban pynkhlain ia ka jingai jingshakri ha ka jingiakhun ia ka HIV/AIDS ha ka jylla bad ula shimkhia ban pyniaid shakhmat ia kane ka kam.
Ia kane ka kali yn sa pynkhamti ha ka Meghalaya State Network of Positive People (MSNP+), ha kaba yn pyndonkam ha kaban buddien bad ban donbynta bad ki riewshimet kiba la hap ha ka kyrdan Loss to Follow-Up (LFU). Kan kyrshan ruh na ka bynta ban pyndonkam ha ki prokram leit ai jingpynsngewthuh kiba la pynlong ha kylleng ka jylla.
Haba kren ha ka jingaiti ia kane ka kali, u Malthus S. Sangma ula ong, “Mynta ngi la aiti ia kane ka kali Bolero sha ka Meghalaya AIDS Control Society kum ka jingmihkhmat na ka bynta u Lamphang, nga dap da ka jingsngew burom ban aiti ia kane sha ki ophisar ka MACS. Kane kadei ka jingangnud kaba la slem bha ban don ia ka kali kaban lah ban leit sha ki jaka ha ki thain nongkyndong, ban ai jingshakri ia ki briew kiba don ia ka jingpang HIV kiba mad ia ka jingeh ban ioh ia ka jingsumar ha Shillong. Kane ka kali kan long ka lad kaban yn lah ban leit ai jinsghakri haduh ha ki iing ki sem na ka bynta kito kiba donkam khamtam ha ki thain nongkyndong bad ha ki jaka kiba don sha jngai bha”.
“Nga ngeit skhem ba kane ka jingai kaba rit kaba don ia ka jingmut kaba bha na ka Meghalaya Legislative Assembly, hapoh ka jingbtin bad ka jingsbun mynsiem jong u Lamphang, kan iarap shibun ha kaban kyrshan ia ki riewshimet bad ia ka imlang sahlang ha ka jingiaid shaphrang ha ka jingiakhun ia ka HIV/AIDS ha ka jylla” ula ong.
.){kind=link}