Shillong Lber 20: Ka KSU Mawlai Ciricle hynne ka sngi Balang, kala aiti ia ka iïing kaba la pynshna ia kawei ka longiing ha Mawlai Nongkwar kum shi bynta na ka jingrakhe ia ka jingdap 46 snem ka seng.
Ia katei ka iing la aiti da u General Secretary ka seng samla Donald V Thabah ha ka jingiadonlang u Rangbah Shnong ka Mawlai Nongkwar Bah M Rumnong bad kiwei kiwei ki Nongialam Shnong.
Kane ka Longiing kaba ioh Iing ka dei jong ka Kong R Jyrwa, kaba la ioh ruh ia ka jaka kaba la ai sngewbha da ka Kong Streamlet Kharbhih.
Kumjuh ruh ka KSU Shillong Mihngi Circle hynne ka sngi, kala noh synniang da ki Laptop bad ki Computer sha ka skul jong ka Dorbar Shnong Nongmensong hapoh ka jingialam jong u Finance Secretary u Samla Khrawbor Kharkongor bad u Education Secretary u Samla Jeremaiah Pohthmi ha ka jingdon ryngkat ki dhkot jong ka seng.
Ka jingnoh synniang ka KSU kadei halor ka nongrim bad iarap ia ki samla pule ha katei ka skul ba kin kynjoh sha ki kyrdan ba sha jrong ha ka juk ba mynta bad ki kyrmen skhem ba kane ka jingai jingiarap ka seng kan long kaba seisoh bad kan iarap shibun ia ki khynnah skul.
Ka KSU kala aiti ia kitei ki jingiarap sha ka Principal jong katei ka skul.
