Guwahati, Lber 31: Khyndiat sngi shwa ka jingialang sain hima kaba heh jong ka Aam Admi Party’s (AAP) ha Guwahati, na ka liang u Myntri Rangbah (CM) ka Assam u Himanta Biswa Sarma u la kynthoh pyrshah ia u CM ka Delhi u Arvind Kejriwal.U Sarma u la kob ia u Kejriwal ba un wan sha Assam bad ong ia kaei kaba ula ong dang shen hapoh ka dorbar assembly ha Delhi.
U Kejriwal la ong ba u la pynpaw hapoh ka dorbar Assembly ha Delhi ba ki don ki case pyrshah ia u CM Himanta Biswa Sarma ha kiwei pat ki jylla.
“U Arvind Kejriwal u dei u khawpud uba shongrieh ha ka pyrda jong ka Delhi Assembly bad pynmih ia ki kyntien lamler.Ai ba un ong ba ki don case kynnoh bamsap pyrshah ia nga shabar ka Assembly, bad Ngan ujor mukotduma pyrshah ia u ha kajuh ka rukom kumba Nga la leh ia u paralok jong u, u Manish Sisodia,” ong u Sarma sha ki lad pathai khubor ha Guwahati.
U Kejriwal ha ryngkat u CM ka Punjab u Bhagwant Mann la khmih lynti ba kin wan ban iashim bynta ha ka rally sain hima kaba nyngkong eh ha Assam ha ka 2 tarik mynta u bnai ha Guwahati.
“Kam long kaba donkam ia kaei kaba u Arvind Kejriwal u la ong, hynrei kaba donkam ka long la ka jingkren ka jong u ka long kaba shisha ne ka bym shisha?” pynpaw u incharge ka APP ka thain Northeast u Rajesh Sharma lyngba ka twitter.
