Aipor sa 15 sngi ka MoE ia ka Inquiry Committee ban ai kaiphod halor ka kam NEHU

Shillong, Nohprah 01 : Ka Ministry of Education kala aipor biang sa 15 sngi ia ka Committee ki arngut ki Dkhot, kiba tohkit ia ki jingkynnoh pyniaid kam bakla bad jingbym biang ka rukom treikam hapoh ka North Eastern Hill University (NEHU), ba kan aiti ia ka kaiphod.

Kane kala mih hadien ba ka jingbuhpor ia ka Committee ban pyndep ia ka jingtohkit, kala kut noh ha ka 29 tarik Naiwieng.

Ha ka shithi bala phah da u Under Secretary ka Sorkar India DK Himanshu sha u Chairman ka Inquiry Comkttee, NEHU bad Chairman barim ka UGC Prof DP Singh ha ka sngi Thohdieng kala ong “Haba iadei bad ka shithi ka Ministry ba 14.11.2024 bad ka shithi u Chairman ka Inquiry Committee ba 28.11.2024, la ong ba ka borkhmih kala aibor biang sa 15 sngi ban pyndep ia ka jingtohkit bad aiti ia ka kaiphod”.

Ha ka 14 tarik Naiwieng, ka MoE kala thung ia ka Committee ki arngut ki dkhot ban tohkit ia ki jingkynnoh pyniap kam bakla bad jingbym biang ka rukom treikam hapoh ka skulbah.

Ia kane ka rai la shim halor ka jingiakhih shah thngan ba khlem pud da ka North Eastern Hill University Students’ Union (NEHUSU) bad kyrshan da ka Khasi Students’ Union-NEHU Unit, kiba dawa ban weng kam mardor ia u Vice Chancellor Prof PS Shukla, u Registrar bad Deputy Registrar.

Ha ka 25 tarik Naiwieng, ki arngut ki dkhot ka Committee kila iakynduh bad shong ban sngap ia baroh ki kynhun seng ka NEHU ba kynthup ia ki samla pule, ki Nonghikai bad ki Nongtrei, kiba la phah ia ka khubor kaba shai ba kam pher la ka jingmih ka long kumno kumno ruh na ka jingtohkit, ka jingwan phai biang jong u Vice Chancellor ba mynta sha ka skulbah ka dei ka bym iahap bad ka bym pdiang shuh da ki.

Ha ka hukum, ka MoE kala ong “Namar kine ki jingpynsngew jong ki samla pule bad ki khubor ba mih ha ki lad pathai khubor, ka MoE kala rai ban thung ia ka Inquiry Committee halor ki jingkynnoh pyniaid kam bakla bad jingbym biang ka rukom treikam hapoh ka NEHU, Shillong”.

Kala ong ba ki jingkynnoh kila poi sha ka Ministry bad kine ki kynthup ia ka jingnang hiar kyrdan ka skulbah, ka jingthung kam ba jyrwit jyrwat, ka jingkiar ban pynbiang ia ki jingtei ba kongsan bad ka jingmynthi jong u Vice Chancellor ia ki jing ud jingnam.