Shillong, Naiwieng 22: Ka All Jaiñtia Muster Roll Workers Union (AJMRWU) ka la ai por haduh 10 tarik Nohprah ïa ka Sorkar ba kan pyntreikam noh ïa ka Floor Rate and Variable Dearness Allowance (VDA) katkum ka Minimum Wage Act 1948, ryngkat bad kiwei ki jingdawa.
U Adviser ka AJMRWU u Bah Khroo L Pariat u la ong ba ïa kane ka rai la shim ha ka jingïalang jong ki nongtrei muster roll na kylleng ka jylla, kiba la pynpaw ïa ka jingsngew bynniaw halor ka jingbym shimkhia ka Sorkar ïa ki aiñ bad ki hukum kiba la don lypa.
“Ngi la rai ba ngin dawa naka Sorkar Meghalaya ba kan pyntreikam ia ka floor rate bad ka VDA kumba long ha kiwei pat ki Jylla jong ka ri India” ong u Bah Khroo.
“Ka Sorkar ka dei ban pyntreikam ia kine ki jingdawa jong ngi bad ngi kyrmen ba u Myntri Rangbah ka Jylla Conrad K Sangma bad Kynhun Myntri Sorkar kan leh ia kaba donkam_.
Ka AJMRWU ka la pynpaw ruh ia ka jingsngewkhia halor ka snem ban shongthait jong ki nongtrei muster roll da kaba kdew ia ka hukum jong u Lat ka jylla Meghalaya ha u snem 2009, kaba ong ba ka snem shongthait kam dei ban palat ia ka 65 snem.
U Bah Khroo u la kynnoh ba ka don ka kynrum kynram hapdeng ki ophisar jong ki tnay ha kaba ia dei bad ka jingpyntreikam ia kane ka hukum, bad ka Union kan ujor sha u Myntri Rangbah ban dawa pynshai.
Ka la pynpaw halor ka jingïoh shuti Maternity kaba la shah kyntait ïa ki kynthei kiba trei Muster Roll, watla kidei hok ban ioh katkum ka aiñ.
Ka Union kan pynkynmaw ia u Myntri Rangbah ka Jylla, uba bat ia ka tnat personnel bad Finance ban pynthikna ban bud ryntih ia katei ka ain.
Ka la pynpaw ruh ïa ka jingsngewdiaw halor ka jingbym pyntreikam ïa ka aiñ jong ka Employees Provident Funds (EPF), wat hapdeng ka jingthoh na u Regional Commissioner, EPFO, Shillong, sha u Chief Secretary ha u bnai Iaiong 2025.
Lada ka Sorkar kam lah ban pynurlong ïa ki jingdawa jong ki haduh ka 10 tarik u Nohprah, ka Union ka la byrngem ban leh da kaba tyngeh, kynthup ïa ka jingrakhe Khristmas hakhmat ka Secretariat, ka sienjam kaba thmu ban pynbor ïa ka Dorkar ba kan leh ïa kaba donkam.
“Ngi kyrmen ba ka Sorkar kan khot ia ngi ban iakren, namar ba ngim kwah ban iakhih pyrshah iaka Sorkar, hynrei lada kam kohnguh, ngi long kumba shah pynbor ban iakhih. Ngi la rai ban rakhe ia ka Khristmas hangne ha Shillong ha khmat ka Secretariat,” la ong u Bah Khroo.
 ka la ai por haduh 10 tarik Nohprah ïa ka Sorkar ba kan pyntreikam noh ïa ka Floor Rate and Variable Dearness Allowance (VDA) katkum ka Minimum Wage Act 1948, ryngkat bad kiwei ki jingdawa.){kind=link}