Aipor biang ka Iingkashari sa 2 sngi ia ka SIT ban tohkit ia ka Sonam Raghuvanshi bad u Raj Kushwaha

Shillong, Jylliew 19 : Ka Iingkashari Chief Judicial Magistrate (CJM) ha ka sngi Palei, kala aipor sa 2 sngi ia ka Special Investigation Team (SIT) ban set ia ka Sonam Raghuvanshi bad ia u baieid jong ka-Raj Kushwaha ha ka Police Custody.

Hynrei ia ki laingut ki runar kiba pyniap ia u Raja Raghuvanshi, u Vishal Singh Chauhan, Akash Rajput, bad Anand Kurmi, ka Iingkashari kala hukum ban set noh ia ki ha ka Judicial Custody ba 14 sngi.

Ia kine ki 5 ngut ki nongpyniap briew la ialam tian bishar biang hakhmat ka Iingkashari hadien ba kut noh ka Police Custody ba 8 sngi.

“Ia ka Sonam bad u Raj, la phah biang sha ka police custody ba 2 sngi bad kiwei-Anand, Akash bad Vishal, la phah sha ka Judicial custody ba 14 sngi” ong u Public Prosecutor T Chanda haba iakren bad ki nongthoh khubor hadien ba mih na Iingkashari.

Ha ka sngi Ba-ar, ka SIT kala pyndep ia ka jingpynwandur biang ia ka kam bymman bala leh da kine ki 5 ngut ha Sohra, kaba lam ruh sha ka jingioh kurup sa ia kawei ka wait ba pyndonkam ban pyniap ia u Raja Raghuvanshi, na kshaid Weisawdong.

Ka SIT kala leit ruh ha kylleng ki jaka naduh ka jaka pynieng kali ha Mawlakhiat, ka jaka ba u Raja bad ka Sonam ki pynieng ia ka scooty ba ki shim wai, bad ruh ha ka jaka pynieng kali ha Kshaid Wei Sawdong, kaba jia ka jingpyniap.

Kat kum ka jingong ki Pulit, kine ki 3 ngut kila pom ia u Raja da ka wait ha kane ka jaka pynieng kali ha Kshaid Weisawdong bad hadien, kila bret ia ka met sha ka riat bah ha ka 23 tarik Jymmang.

Lah ban kdew, ba kawei ka kynhun ki Pulit ka Jylla, kala don mynta ha Indore ban pynlong ia ka jingtohkit ia kane ka jingjia khamtam ia ki bahaiing hasem ka Sonam Raghuvanshi.
Kane ka kynhun kala leit sha ka Iing jong ka Sonam bad ruh sha ka karkhana jong u hynmen bad tohkit ruh ia ka Kmie bad Kpa ha Indore.

U Superintendent of Police ka East Khasi Hills Bah Vivek Syiem ula ong “(Kumba ngi kyrpad) ngi la ioh arsngi ban set ha ka Police custody ia ka Sonam bad u Raj katba ia kiwei la phah sha ka Judicial Custody”.

“Ynda la wan poi ka kynhun jong ngi (na Indore) lane ngi nang ioh shuh shuh ia ki jingtip nangtei, ngin sa pan ia ki 3 ngut ha ka Police Custody” ula ong.

Kat kum ka jingong jong u, ia ka Sonam bad u Raj, yn sa ialam tian bishar biang ia ki hakhmat ka Iingkashari la sngi Saitjain.

Haba kylli, u Bah Vivek ula ong “Hadien ba ngi la pyndep ia kane ka arsngi, ngin sa shong bishar ia ka jingtohkit bad hadien lada donkam, ngin sa pan biang ia ki ha ka police custody”.

Ula pyntip ba ka kynhun ki Pulit ka dang don shibun kiei kiei kiba donkam ban leh ha Indore.

“Ngi la dep ban tohkit ia u Govind Raghuvanshi bad ia ka kmie u Rovind bad mynta ka sngi kila dep ithuh ruh ia u nongniah kali, uba kit ia ka Sonam sha Uttar Pradesh” ula bynrap.

U SP ula iathuh ba u Sanjay Verma u dei tang ka kyrteng ba shu pyndonkam thok, kaba la register ha ka true caller hynrei u nombor phone u dei hi jong u Raj Kushwaha. Ula ong ba ka jingiakren phone hapdeng ka Sonam bad u Raj kala bun bah.

Nalor kane, u Bah Vivek u pyntip ba ka kynhun ki Pulit ki dang wad mynta ia ka phone kaba ar jong ka Sonam. “Ngi ngeit ba kane ka phone ka don lang bad ki jingdeng remdor bad kiwei kiwei ki mar kiba ka Sonam kala ieh shadien”.

“Ngi la kyrmen ba ka kynhun haka por ba leit sha Iing ba sah ka Sonam, kin lap ia ki tiar ki tar ba ieh ka Sonam namar ka Iing ka dei kaba la khang tala hynrei la suba ba ia kine ki tiar la rah noh da mano re mano bad ka kynhun ka dang don shatei ban wad mano ba shim bad shaei kine ki mar ki don” ula ong.

Haba iadei ba u nongleh Instagram, ba thep ia ka video jong ka Sonam bad u Raja, u Bah Vivek ula ong “Ngi la pyrshang ban kren ia u hynrei u khlem pat jubab satia ia ngi. Ngi la thoh ha ka Instagram ba un ai ia ki jingtip ba bniah khnang ba ngin lah ban shim statement na u ruh”.

Halor kawei pat ka jingkylli, u SP ula ong ba shibun ki jingtohkit bad jingkylli la kylli ban ioh lum shuh shuh ia ki jingshisha khnang ba “Ngin ioh ia ki jingtip ba pura”.