Shillong Lber 17: Ka North-Eastern Hill University Students’ Union (NEHUSU), North-Eastern Hill University Teachers’ Association (NEHUTA) bad ka North-Eastern Hill University Non-Teaching Staff Association (NEHUNSA) kila shim ia ka rai ban ai por 48 kynta ia ka Ministry of Education bad ka dawa ba dei ban thung noh mardor ia u Acting Vice-Chancellor jong ka skulbah.
Ha ka jingialang kaba la long hynne ka sngi Nyngkong, kitei ki 3 tylli ki kynhun kila kyntait ban pdiang iaka rukom treikam jong u Prof. P. S. Shukla uba la shimti biang ia ka kam kum u Vice Chancellor da kaba shu pyndonkam da ki kor ki bor. Kila kam ba u Prof. Shukla ula pep trei bad ym shim la don hapoh ka skulbah la palat ia ka 130 sngi bad kila dawa ba dei ban sangeh ai tulop ia u namar ba ula pynlut ia baroh ki shuti ki jongu kiba ula pan. Kila dawa ruh ba dei ban sangeh ai tulop ia u Registrar bad Deputy Registrar namar kila pep ban wan sha ka skulbah kaba long kumjuh hi ka por pep ka jong ki ruh.
Kila pynpaw ba ka skulbah kam lah ban pdiang ban ym don ia u VC ha ka jaka pule, u President ka NEHUTA u Prof. Lakhon Kma ula ong, “Ngi lah don ia ka jingjia ka bym ju jia koit ha Shillong, kaba ngim don ia u VC bad u VC uba pura ula jah klep. Ka paw kumba ula kam ba ula sdang trei biang da kaba leh Online, ia kaba ngi lah kyntait ia katei namar ba ha ki kyndon treikam jong ka sorkar India, kam shym la don kano kano ka kyndon ain ban sdang trei da kaba shu leh Online, Kumta um don ha ka jaka kaba u trei, kumta ia ngi hi, u dang shim shuti”.
Ula ong ba u Prof. Shukla ula shim shuti lynter palat ia ka 130 sngi bad la pynlong ruh ia ka jingtohkit bad ia ka kaiphod la dep ban aiti sha ka tnad jong ka sorkar pdeng bad ia ki jinglap ym pat shim la pynpaw paidbah.
“Kumno uno uno ruh u lah ban pynbna ialade ba ym shim la donkti eiei pyrshah ia ki jingkynnoh bad ka kam pat ba ula shimti biang ia ka kam ban trei kum u Vice Chancellor?” la lyngngoh u Prof. Kma.
Ka jingshim rai hynne ka sngi Nyngkong yn sa phah sha ka Ministry of Education ba kan pdiang bad ka ai por 48 kynta. Lada ka Ministry ka pulom ha kaban shimkhia ia ka jingdawa, kila byrngem ba dei ban pyntreikam ia ka Clause 2(A)(5)(ii) jongka NEHU rules, kaba ailad ia uba rangbah tam ha ka kam ban shimti kum u Acting VC. Lada ym shah ia katei, kumta sa shisien biang kin pynlong ia ka jingiakhih.
“Ka University kan phah ia ka shithi sha ka Ministry ha kaba yn kynthup lang ia ka rai kaba ngi lah shim bad ban ap ia ka 48 kynta. Lada kim leh eiei, kumta ia katei ka kyndon yn hap ban pyntreikam bad u Professor uba la rangbah tam uba don ha ka skulbah yn shimti kum u Vice Chancellor ban pyndep ia ka kamram jong u Vice Chancellor,” ula pyntip.
Ka Clause 2(A)(5)(i) & (ii) jongka NEHU’s Statutes ka ong: (5) (i) lada jia ba u Vice-Chancellor ym lah ban pyndep iala ka kamram namar ka jingpep ne na kiwei pat ki daw, ia ka kamram ka jongu dei ban trei noh da u Pro-Vice Chancellor, lane lada don palat ia uwei u Pro-Vice Chancellor, kumta Pro-Vice-Chancellor uba la rangbah tam yn shimti ban trei ia ka kam. Lada u Pro-Vice-Chancellor ym don, kumta u Professor uba la rangbah tam u dei ban trei ia ka kam jong u Vice-Chancellor. (ii) Lada ka ophis treikam jong u Vice-Chancellor ka kylla long thylli namar ka jingkhlad noh, ka jinghiar shuki, jingshongthait ne na kiwei pat ki daw, u Professor uba la rangbah tam u lah ban trei ia ka kam jong u Vice-Chancellor tad haduh ba u Vice-Chancellor bathymmai ula shimti ia ka ophis treikam.
Katba u President ka NEHUSU u Sandy Sohtun ula kynthoh pyrshah ia u Prof. Shukla ban pyniaid ia ki kam jong ka skulbah da kaba shu nion ia u ‘remote’.
“U pyrshang ban pyniaid ia ka skulbah lyngba ka WhatsApp na Guwahati, ia kaba ngim lah ban pdiang” la ong u Sohtun bad ka bynrap ba ki samla pule kin ym ailad ia u Shukla ban wanphai sha ka skulbah bad ki iengskhem ba lada ka Ministry ka pulom ha kaban leh eiei ha ka por kaba la buh, kumta kin pynthikna ba ia ka kyndon ain dei ban bud ryntih ha kaban thung ia u Acting VC.
Ki samla pule kila byrngem ruh ba kin pynthymmai ia ka jingiakhih ka jongki, lada jia ba ym leh eiei ia ki jingsngewkhia ka jong ki.
“Mynshwa kim shym la sngap ia ka sur jong ki samla pule ne kiba don bynta lang ha ka kam. Ngi la hap ban pynlong ia ka jingshah thngan ha ka 5 tarik u Naiwieng. Lada ia kane ka kam ym pynbeit bad ka committee ka dang pynslem ban pynmih ia ka kaiphod, ngi lah ban sdang biang ia ka jingiakhih ka jong ngi ne ia ka jingshah thngan” ula ong.
Baroh 3 tylli kitei ki kynhun kila pynpaw ba ki iengskhem ba kin ym ailad ia u Prof. Shukla ban wanphai sha ka skulbah bad ki kwah ba udei ban resain noh bad ban mih noh na ka skulbah.
, North-Eastern Hill University Teachers' Association (NEHUTA) bad ka North-Eastern Hill University Non-Teaching Staff Association (NEHUNSA) kila shim ia ka rai ban ai por 48 kynta ia ka Ministry of Education bad ka dawa ba dei ban thung noh mardor ia u Acting Vice-Chancellor jong ka skulbah.){kind=link}