Shillong, Jymmang 13: Ka Voice of the People’s Party (VPP) hynne ka sngi kala ai por 48 kynta iaka sorkar jylla ba kan pynmih daka hukum, kaba pynbna ban pynsangeh shwa iaki jingthungkam haki tnat sorkar kat bym pat lah pynbeit ia ka Reservation Policy bad ka Roster System.
U President ka VPP bah Ardent ula ong ba lada ka sorkar kam pynmih iaka hukum, ka VPP kan pynbna da ki prokram iakhih haki sngi ban wan.
Ia kane u bah Ardent ula pynbna haka jingialang kaba lyngkot ha jaka ieng kali jong ka Additional Secretariat Shillong hashuwa ban leit ai iaka Dorkhas sha u Myntri Rangbah ka jylla Conrad K Sangma ban dawa ba ka Sorkar kan khot daka dorbar kyrpang ban iatai halor ka bhah thungkam lane ka State Reservation Policy bad ka Roster system.
Ki nongialam ka VPP kiba iadonlang ha kane ka sngi ki kynthup ia u MLA ka North Shillong bah Alderbert Nongrum, u MLA ka Mawlai bah Brightstarwell Marbaniang, u MLA ka Mawryngkneng bah Heavingstone Kharpran, bad u General Secretary ka party Dr. Ricky Syngkon ha ryngkat ka jingkyrshan lang daki riew paidbah.
U bah Ardent ula ong ba nalor kane ka jingbuh por iaka sorkar, haka dorkhas ka VPP ka dawa ruh ba ka sorkar kadei ban pynsahngeh noh mardor ïa ka jingpynrung kam ha ki tnad sorkar bapher katba ym pat wanrah ïa ka jingpeit bniah ia ka Reservation Policy bad iaka Roster System.
Ha kane ka sngi, ka VPP kala leit ban aiti ia ka dorkhas ha u Symbud Myntri Rangbah ka Jylla Bah Sniawbhalang Dhar ba un pynpoi sha u Myntri Rangbah ka Jylla.
Pule lang ia kane: Iakynduh u Conrad ia u Scindia, pan heliport ha Shillong bad Tura bad International Airport
