Tura, K’lyngkot 30 : Ka Meghalaya Pradesh Congress Committee (MPCC) kala aipor 48 kynta ia ka Youth Congress ka Ri-lum Garo ba kan ai jingpynshai halor ka jingiakhih bad jingthang ia ki tyngshop ki Nongialam ka Party ba kynthup ia u ma Vincent H Pala bad ka Deborah Marak myn ha ka miet sngi thohdieng.
Kane ka jingaipor kan kut lashibit da miet ka 30 tarik u Kyllalyngkot.
U Secretary ka MPCC Sanjay Das ula ai ia ka showcause na Shillong bad la phah ia ka sha u Nongialam ka Youth Congress Robert K Sangma, uba ialam ia ki dkhot ban iakhun pyrshah ia ka party ha kine ki arsngi bad dawa ia ka party ban shong bishar biang ia ka jingjied kyrtong ha ki katto katne ki constituency ka Ri-lum Garo.
Ka Youth Congress kala pynlong ia ka dharna ha ka Republic Day shabar ka Congress Bhavan ha Tura bad hadien kila thang ia ki dur tyngshop jong u ma Vincent, Deborah bad ruh jong u kyrtong na North Tura Billykid A Sangma bad u kyrtong na Gambegre Saleng A Sangma.
Watla ka Youth Congress kala rai ban jubab ia kane ka jingpan jingpynshai kat kum ka nongrim ba ki don, hynrei kala mih ruh ka jingiakren bad bun ki dkhot kin sa iehnohkam halor kane ka kam.
“Ha ka jaka ba kin sngap ia kaei kaba ngi don ban ong bad ban pyrkhat bha balei ba ngi mih ban pyrshah bad ban pynshai halor ka rai ban jied ia ki kyrtong ki bym dei na ka Congress, ka High Command kala leh bym patiaw ia nga bad ai pynban da ka showcause” ong ki Nongialam ka Youth Congress.
“Ngi kwah ia ka jubab balei ba ki briew naka liang pyrshah bad kiba ju ieng pyrshah ia ka Congress bad kiba la wan rung tang ban ioh ticket hadien ba ki shah kyntait nala ki jong ki party, la shu pdiang ia ki ha ka jaka jong ki Nongtrei ka Party kiba la pynkhreh ban mih iakhun ia ka elekshon mynta la shisnem arsnem” buh jingkylli u Robert K Sangma.
Ula ong ba kine ki kyrtong kiba dang shu wan rung dkhot sha ka Congress tang mynnin bad ki bym iapher kum ki briew nabar, kiba la shim kabu ia ka party bad kila ioh long ki kyrtong ha ka jaka ki nongtrei ka party kiba la trei shitom. U ong ba ia kane la sakhi na ki constituency ka Salmanpara, Gambegre bad Kharkutta.
Ha Salmanpara, u Nongtrei ka Congress bala slem bha u Damrik K Sangma ula shah bujli shimiet shimiet da u Sinbath Marak watla u Damrik ula pynkhreh la palat arsnem ban mih aireng ha ka elekshon.
Ha Khatkutta, u MLA barim Omillo K Sangma bad kawei ka Longkmie kila shah leh lyndet da u briew ba dang shu wan rung thymma u Chireng Peter R Marak.
