Shillong, Jymmang 19 :Ka Taxi Drivers Association ka Khyndailad, kala aipor 24 kynta ia ka Tnad Pulit ban kem ia ka kynhun ki bar Jylla kiba shoh dusmon ia uwei u Nongniah Taxi Khasi hynnin ka janmiet ha Khyndailad.
Une u Nongniah taxi ba shah shoh u kyrteng u Bashai Syiem bad ula mynsaw jur na ki bynta jong ka khlieh. Ia une u nongniah kali la kit mar mar sha Civil Hospital, Shillong ban ai jingsumar.
La iathuh ba u Bashai ula shah thombor ha ka kynhun ki bar jylla kiba la suba jur ba ki dei na ki jaidbynriew Sikh.
Halor kane ka jingjia, ka Taxi Drivers Association kala byrngem ban nym ailad satia ia ki nongniah taxi bar jylla ba kin wan rung sha Khyndailad katba ki Pulit kim pat kem ia ki briew kiba donkti ban shoh dusmon ia u Bashai Syiem.
Ki bor District bad ki Pulit kila leit iakynduh hynne ka step sngi Thohdieng ia ki Taxi Drivers Association ban sngap thuh ia ka jinglong jingman.
Hynrei, ki Nongniah taxi kila byrngem ban sangeh kamai lada ki Pulit kim lah ban kem ia ki runar kiba shoh ia uwei na ki dkhot jongki hynnin ka janmiet.
