Shillong, Iaiong 26 : Ka Single Member Committee ba la thung da ka Iingkashari Meghalaya High Court, kala aipor 15 sngi ban pynkit noh ia baroh 75000 MT u dewiong ba dang sah sha ki depot bala ithuh ba kynthup ka 5000 MT u dewiong ha West Khasi Hills bad 70,000 MT ha East Jaintia Hills District.
Ia kane la pyntip da u Justice BP Katakey uba khlieh ia kane ka Single Member Committee haba iathuh ba dang do palat 3 lak MT u dewiong na ka 14 lak MT uba la dep shim jingkhein/pynshisha, uba dang sah ban lilam ha Meghalaya.
“Ka jinglilam ba dang sah ka long kumba 3 lak MT u dewiong na ka 14 lak MT. Hynrei, ia ka jingkhein ba thikna hi ka long kaba eh ban ong” ong u Katakey haba iakren bad ki nongthoh khubor.
Ula iai ban ba palat 14 lak MT u dewiong u dei uba la shim jingkhein biang ym haduh 32 lak MT bala pyntip kham hashuwa ha ka affidavit bala file sha ka Iingkashari Supreme Court.
U Katakey u pyntip ruh ba palat 75000 MT u dewiong u dang sah ban pynkit sha ki depot bala ithuh. Kine ki kynthup ia 5000 MT ha West Khasi Hills bad 70000 MT ha East Jaintia Hills.
“U Deputy Commissioner ka WKH ula kular ban pynut noh ia u 5000 MT lashai ka sngi katba ia u 70000 MT, nga la bthah ia u DC ka EJH ban pynshisha ia ka jingdon jong u bad ban pynkit noh sha ki depot bala ithuh da ka Sorkar hapoh ka 15 sngi naduh mynta ka sngi khnang ban gin lah ban shim jingkhein ia baroh ka jingdon u dewiong ha ki depot bala khmih da ka Sorkar” ula ong.
Haba pyntip ba ka Committee kala tyrwa ban leh ia ka drone survey, u Katakey ula ong “Kumta, ngi la tyrwa ban leh da ka drone survey. Ngi kwah ruh ban shim ia ka jingiarap jong ki briew ka NESAC bad ngi la khot ia ki sha ka jingialang ban wan ban wad ia ki lad ki lynti ha kaban shondur lyngba u satellite ia ki jaka pynmih dewiong khnang ban lap la ki dang don dewiong ne em ha kine ki jaka.
“Lada ngi dang shem ia ka jingdon u dewiong ba tip ha madan madiah uba la tih be-ain,ia une u dewiong un shu kurup beit bad yn ym siew pisa satia sha ki trai bad kane ka pisa baroh kan leit sha ka pla pisa jong ka Sorkar na ka bynta ka jingmyntoi jong ka Jylla” ula maham.
Ha kajuh ka por, ka Committee u Katakey kala bthah ruh ia ka Sorkar Jylla ban pynjynsur ia ki nongthied dewiong kiba jop ia ka jingiathong ban pyniaid iew, ba kin lah bansiew ia baroh ka pisa jong u dewiong ba lilam. Ki nongthied dewiong kila kam ba kim shym la lah ban siew ia ka pisa namar ba hiar ka iew.
