Shillong, Nohprah 22 : Ka Balang Katholic, kala aibor ia ki Lyngdoh Katholic (Priest) ba ki lah ban kyrkhu mynta ia ka kam iashongkha para shynrang ne para kynthei (same sex).
Kane kala jingaibor kala mih na u Most Rev Victor Lyngdoh DD, ka Jyllaniam Bah Shillong, uba la phah ia ka jingpyntip sha baroh ki Lyngdoh, ki riewniam bad ki para bangeit ka Jyllaniam Bah Shillong hynne ka sngi Thohdieng ka 22 tarik Nohprah, 2023.
Kat kum ka shithi bala ioh copy da Ka Shlem, u Most Rev ula ong pat ba kane ka jingkyrkhu ia kiba shongkha para shynrang ne para kynthei kam dei ban iaid kat kum ka Ain jong u Blei bad kan ym don ia ka Jinglehniam jong ka Balang ka ban iadei kyrdan kat kum ka Sakrament Jingkyntiew Kurim.
Ka shithi ka ong “Ka Balang Katholic kala pynmih paidbah ia ka dulir “Fiducia Supplicans” ha ka 18 tarik Nohprah 2023 lyngba ka “Dicastery for the Doctrine of Faith” kaba la ai jingbit da u Kpa Bakhuid, u Pope Francis”.
“Da kane, u Lyngdoh Katholic u lah ban kyrkhu ia kiba shongkha ym kat kum ka ain jong u Blei, bad kan ym don ka jingleh niam jong ka Balang ka ban iadei kyrdan kat kum ka Sakrament Jingkyntiew Kurim. Ka riti lehniam jong ka Sakrament Jingkyntiew Kurim ka dei tang na ka bynta ka jingialong kawei jong u Shynrang bad ka Kynthei ha ka jingiateh jutang ba shijunom” la bynrap.
Ka shithi ka ong ruh “ Kane ka dulir ka thew ia ka jingmut jong ka jingduwai kyrkhu. Kane ka dei ka jingduwai kaba u Lyngdoh u lah ban duwai hi khlem da shim ia ka jingduwai jong ka Balang. Ia kane ka jingduwai kyrkhu ym dei ban sngewthuh bakla ba kane ka dei ka jinglehniam jong ka Sakrament Jingkyntiew Kurim jong ka Balang Katholic”.
“Na ka ta ka daw, kane ka dulir ka khlem pynkylla ia ka ain tynrai jong ka Sakrament Jingkyntiew Kurim ha ka Balang Katholic bad ka jingduwai jong u Lyngdoh kam mut ba u mynjur ne pynshlur ia ka jingleh jong ki” kala bynrap.
Haba ai khublei Khristmas bad Snem Thymmai, u Most Rev Victor Lyngdoh ula ong “ To ngin iai bat ia ka jinglong bakyntang jong ka Sakrament Jingkyntiew Kurim”.
