Shillong, Lber 09 : U Myntri Rangbah ka Jylla Conrad K Sangma, ula aiti da ka shuki Chairman jong ka Meghalaya State Planning Board (MSPB) ia u President ka United Democratic Party (UDP) bad MLA ka Mairang Bah Metbah Lyngdoh.
Haba pyntip ia kane hynne ka sngi Palei, u Myntri Rangbah ka Jylla Conrad K Sangma ula ong “Ka jingpynbna (notification) halor kane ka kam, kan sa mih mynta ka sngi”.
U Conrad ula kubur ruh ba ula ioh pdiang ia ka shithi halor ka rai bala shim da ka Bharatiya Janata Party (BJP) bad ka Hills State People’s Democratic Party (HSPDP) ban iasam ia ka shuki Myntri hapdeng ki MLA ka party mar arsnem shiteng.
“Hooid, ka BJP kala phah shithi sha nga bad ka HSPSP ruh ha ka por ba ki iakynduh nyngkong ia nga, kane ka dei ka kyndon bad ka dei kaba la iakren” ula ong.
Haba phai sha ka UDP, u Conrad ula ong “Kane ka dei ka kam pohiing (jong ka UDP). Ki khlem pynpaw eiei ha nga halor kane (ka jingiasam ia ka shuki Myntri) hynrei haba phai sha ka HSPDP bad ka BJP, ki jingiakren kila don hakhmat jong nga”.
Ka UDP ka la ioh artylli ki shuki Myntri katba ka BJP bad ka HSPDP kila ioh mar kawei.
Haba kylli, u Myntri Rangbah ua ong “Ynda la poi ka por, ngin sa iakren halor kane ka kam. Hooid ka jingioh mihkhmat jong ka NPP ha ka Kynhun Myntri ka lah ban nym long kat kum ka jingkwah bad kumba phi ong, ngi la don bun nombor hynrei kumba nga ong pat, ngi don shibun kid aw kaba ngi hap ban iatreilang bad ngi hap ban iapynbeit khnang ban iahun lang baroh. Hynrei ngin sa nang bishar ia ki lad ki lynti kiba don hadien habud”.
U Conrad ula kubur ba don bun ngut ki MLA na Ri-lum Garo bad ong “Hynrei kumba nga ong, ngi la ai 4 tylli ki shuki sha Ri-lum Garo bad 8 tylli ki shuki Myntri na Ri-lum Khasi bad Jaintia hynrei ngi dang pyrshang ruh ban pynbiang tarajur. Ngi tip ba baroh ki kwah ban ioh bynta bad mihkhmat ia ki District ne ki thain jong ki hynrei ka long kaba eh bha namar ngi don da u pud ba hap bud”.
