Nongpoh, Nailur 12 : Kawei ka Longiing jong ka Shnong Saiden, kala ai sngewbha da ki Smart Watch ia ka kynhun ki thei ialehkai phutbol ka skul Saiden Secondary School, ki ban sa mihnoh shen na Jylla ban mihkhmat ia ka Meghalaya sha ka 63rd Natinal Level Subroto Cup ha New Delhi.
Kane ka Longiing ka dei jong u Bah Bakmen Thangkiew uba la sam ia kine ki Smart Watch ha ryngkat ki bahaiing hasem, sha kane ka kynhun ialehkai kum ka dak ban pynkup burom ia ki bad ruh ban ai mynsiem ba kin tyngshain ha ka lympung ialehkai ka Subroto Cup bad ban long ki lahduh.
Ia kine ki smart watch la sam ha ka prokram pynkup burom ia kane ka kynhun bala pynlong hynne ka sngi Ba-ar ha Iingdorbar ka Shnong Saiden. Kane ka Kynhun kan mih noh na Jylla ha ka 19 tarik Nailur hadien ka jingshah pynbit kaba paka na ki coach ha Nongbah Shillong.
Nalor kine ki Smart Watch, ki bor pyniaid skul lem bad ka Dorbar Shnong Saiden, kila air uh ia ki jingai sngewbha sha kane ka kynhun, kaba la nang pynrhem ia ka mynsiem ialehkai jong kine ki thei ialehkai.
Lah ban kdew hangne ba kane ka kynhun ialehkai ka Saiden Secondary School kala shah kynthup ha ka Pool G bad kan iakhun nyngkong eh pyrshah ia ka kynhun jong ka Goa ha ka 20 tarik Nailur.
Ha ka jingpynkup burom ia katei ka kynhun, la wan ban ai mynsiem lang da u Bah Donlang Sohkhlet, Vice Chairman ka Meghalaya Employment Generation Council kum u kongsan, Bobby L Nongbet District Sports Ophisar, ki nongialam sengbhalang ba kynthup ia u Bah Ferdynald Kharkamni, president ka KSU, NKHD, u Bah Marcus Marten, President ka HNYF, Bah Sumarlang Swer u Coach bad Kong Rida Lyndem Manager jong ka kynhun, Bah E.K Lapang, Rangbah Shnong, Bah L C Nongsiej, Head Master Saiden Secondary School, Ki Nonghikai skul, ki khynnah skul, ki Kmie ki kpa lem bad kiwei kiwei.
U Bah Donlang Sohkhlet ruh u la noh synniang lem sha ki bor pyniaid skul jong ka Saiden SS khnang ba kin lah ban kyrshan ia la ka kynhun ha ka jingleit ia shimbynta ha kane ka lympung ialehkai ha nongbah Delhi.
