Shillong Risaw 14: Ka Voice of the People Party (VPP) ka ai khublei ïa ki paidbah jong ka jylla kiba la lah ban pynbor ïa ka sorkar jylla ba kan kular bad ban pynbna paidbah ba kan pynduh pyndam noh ïa ka aiñ ïakhalai ne ka Meghalaya Regulation of Gaming Act, 2021.
U Vice-President ka VPP u Dr. K.H. Shen ula pynpaw ba ka jingdon jong ki nongshongshnong ki ba don ka jingkitkhlieh bad kiba peitngor, kala lah ban pynlong ïa ka sorkar ba kan ai jingkheiñ hakhmat u paidbah.
U la ong, lada ka sorkar ka thmu shisha ban pynduh pyndam noh ïa kane ka aiñ, ka dei ban khot ïa ka dorbar kyrpang ban weng ne pynduh ïa kane ka aiñ. Hynrei kane ruh kadei tang ka jing pynsep ei ïa ka pisa jong u paidbah, namar jin lada ka sorkar ka sngewthuh bad ka shai ka jingmut jingpyrkhat ha kaba wanrah ïa ki polisi treikam, kan nym jin da la jia kumba long mynta.
U Dr Shen u la ong ka jingpynduh pyndam ïa kane ka aiñ tang da ka Ordinance kan dei tang ka kam pynbiej paidbah namar ba ka Ordinance lada kam ïoh ïa ka jingmynjur da ka ïingdorbar thaw aiñ hapoh hynriew bnai, ka Ordinance ka ïap noh bad ka aiñ khalai Meghalaya Regulation of Gaming Act, 2021 ka im biang.
Kumta ban lait na kine ki jnit ki jnat, ka VPP ka kyntu ïa ki paidbah ba kin long phikir bad bishar bha ha ka jingjied ïa ki nongmihkhmat ha kane ka elekshon MLA kaban wan, namar sa kawei pat ka jingbakla ha u 2023 kan nang khynñiat ïa ka jylla sha ki bynta kiba sha trai jong ka roi ka par bad kan long kaba eh shibun ban khyllie pat ïaka sa shisien pat.
