Nongpoh, Rymphang 20: Ka Khasi Student Union (KSU), Umden Unit kala pynkup burom ia ki samla pule kiba pass bha ha ki eksam jong ka Secondary School Leaving Certificate (SSLC) bad ka Higher Secondary School Leaving Certificate (HSSLC), Graduate bad Post Graduate napoh ka thain Umden.
Kane ka Seng kala shim ia kane ka sienjam kum shi bynta ban pynshlur ia ki amla pule ba kin kham lah ban leh bha shuh shuh ha ki jingpule kiba kham shaneng.
Ka KSU-Umden ha kane ka sngi kala pynkup burom ia ki 28 ngut ki samla pule lyngba ka 3rd Maitshphrang Award Academic Excellence Award 2023 ha ka prokram kaba la long hapoh Umden.
Ia kane ka jingialang la pynshongkun da ka jingiadonlang u samla Pynshai Rani, Publicity Secretary ka KSU Sengkmie kum u kongsan, u samla Ferdynand Kharkamni, President ka KSU, North Khasi Hills District kum u symbut kongsan, u samla Toning Lapang, President ka KSU Umden Unit nalor kiwei kiwei ki nongialam bad ki riew pawkhmat ka thain Umden.
Haba ai jingkren, u Samla Pynshai Rani u la ai khublei ia baroh ki nongkitkam jong ka KSU, Umden kiba la lah ban shimkhia sa shisien ban pynlong ia kane ka jingpynkup burom iaki samla pule jong kane ka thain kiba la lah ban pass bha ha ki eksamin jong ki kyrdan pule bapher bapher.
U la ai ruh katto katne ki kyntien kyntu kynpham ia baroh ki samla pule, ba ki dei ban treishitom bad ban minot thop ha ki jingpule bad ban pynthikna ialade ba kin ym ngop noh ha kino kino ki jingshah pynshoi kiba har rukom hynrei ba ki dei ban prat shaphrang ban ioh ia ka jingjop.
U Samla Ferdynald Kharkhamni u la ong “ba ki khynnah pule kim dei ban long kum kito ki phlang ba shu noh kat shaba beh ka lyer hynrei ba ki dei ban long kum ki dieng bah kiba ieng ha la ka nongrim ban poi sha ka thong ha ka jingim ka jong ki bad ruh ba kin nang pynskhem ia la ka jingim khamtam ha ki jingpule khnang ban phyrnai ka lawei ka jong ki”.
Ula kyntu ia ki samla pule ba ki dei ruh ban don ia ka jinglong kaba ngeit sneng ia la ki kmie ki kpa bad ruh ia la ki nonghikai kiba dei ki nongprat lynti ha ka jingim ka jong ki.
Ha kane kajuh ka sngi, ka KSU Umden Unit ka la ioh ban pynhap pyrda noh ruh ia ka 3rd Maitshaphrang Football Tournament, ha kaba ka kynhun ialehkai jong ka Shipara Sport Club ka la iohrah ia ka nam lahduh da kaba pynliem noh ia ka Umden Sport Club da 5-4 kol ha ka jingiakhun kaba la poi sha ka tie breaker.
