Nongpoh, Naiwieng 13: Ka Synjuk ki Seng Samla Hynriew Shnong kila pynkup burom ia 39 ngut ki samla pule kiba pass bha ha ki eksamin bapher bapher da kaba ai khusnam bala tip kum ka Academic Excellence Award 2022.
Kane ka synjuk ka dei jong ka Shnong Sohlait, Nartap, Langpadon, Sohlait Thymmai, Lumkya bad Umsaw Noldhi bad ia kane ka jingsam khusnam la pynshongkun da ka jingiadonlang u MLA ka Umsning bah Jason Sawkmie Mawlong ha ka jingiadon ryngkat u bah Stephen Maring, Bah K Shadap Chairman ka Synjuk bad kiwei kiwei.
Ia kane ka khusnam la sam sha ki samla pule kiba pass naduh ka eksam SSLC haduh kiba la pyndep ia ka kyrdan pule Graduate bad Post Graduate.
Haba kren kum u kongsan, u Bah Jason ula pynpaw ia ka jingkmen ban sakhi ia ka jingdon jong ki samla kiba don ia ka jingkitkhlieh ha ka imlang sahlang bad kiban tei ruh ia ka lawei ki khun samla jong ki 6 shnong ha ka shakri jong ka Synjuk ki Seng Samla.
Ula ong ba kane ka sienjam ban ai khusnam ia kiba pass bha kan dei ka jingai mynsiem bad ka jingpynshlur ia ki samla pule ba kin minot thop ha ki jingpule bad ba kin kiew shaphrang ha ka jingim.
Une u MLA ula ai mynsiem ia ki nongialam ka Synjuk ba kin nang bteng ia kane ka kam khnang ba ki samla pule jong ki 6 shnong kin nang lah ban wanrah ia ka nam ka burom ha ki liang bapher bapher.
U Bah Jason ula ong ba ki samla pule ki dei ki paia baskhem ban tei ia ka imlang sahlang bad ki shnong ki thaw khamtam kito kiba don ia ka jingnang jingstad. Ula kular ruh ban iadon ryngkat bad ka synjuk ha baroh ki liang ban tei ia ka shnong ka thaw bad ban kyrshan ia ki khun samla nalor ban kyntiew ia ka thain baroh kawei.
