SHILLONG, Nailar 23: Ka National People Youth Front (NPYF) kaba dei ka shnat treikam ki samla jong ka National People Party (NPP), kum shi bynta ban pynshlur shuh shuh ia ki samla pule, hynne ka sngi Saitjain kala pynkup burom ia ki samla kiba la pass bha ia ka SSLC bad HSSLC jong u snem 2024-2025.
Ia kane ka jingpynkup burom la pynlong da ka NPYF East Khasi Hills District, ia kaba la pynlong ha Bharat Scout and Guide bad ha kane ka sngi u MLA ka Sohra uba dei ruh u President ka NPP East Khasi Hills District u Bah Gavin M Mylliemngap ula long u kongsan.
Kine ki samla kiba la shah pynkup burom kiba la pass ia ka eksamin SSLC kidei kiba ioh 80% shaneng ka mark bad ki don kumba 119 ngut katba kiba pass ia ka HSSLC kidei kiba ioh 75% shaneng bad ki don kumba 46 ngut bad baroh ki don haduh 164 ngut.
Ia ki khusnam sha ki khynnah kiba pass bha la sam da u Bah Wailadmiki Shylla uba dei u MLA ka Jowai uba dei ruh u President ka NPYF State Unit, u Bah Alvin Sawkmie uba dei u MDC ka Mawsynram, ka Kong Grace Mary Kharpuri MDC ka Nongshken bad kiwei kiwei de ki heh nongkitkam jong ka NPP bad NPYF.
Haba kren ha ka jingialang u Bah Wailadmiki Shylla u la ong, “Kane kadei ka por kaba biang tam ba phi kum ki khun samla phin shim ia ka rai na ka bynta ka lawei ka jong phi, namar ba mynta wat ki briew kiba la nang la stad kim ioh kam ioh jam.”
Shuh shuh u Bah Wailad ula kyrpad ia kine ki khun samla ba kin pule bha ha kaba iadei bad ka Banking System namar kumba long mynta kiba trei ha ki Bank bunsien kim don ki briew lajong ki ban shong ha ki kyrdan kiba heh, mynta ka jylla lah slem bah ka khlem lah shuh ban sei ia ki heh ophisar kum ki IAS kiba dei ki Khasi.
“Kane kadei ka por ba phi kum ki khun samla phin jied kaei kaba phi kwah ban long hadien habud, phi don shibun ki lad ki lynti ba phi dei ban jied hynrei ka shong pat ha phi ki samla pule ba phin jied ia ka lawei jong la jong,” u la ong.
Haba kren kum u kongsan u Bah Gavin M Mylliem u la ong, “Ka jingtrei shitom jong phi ha u snem bala dep bad mynta phi la ioh ban kheit ia u soh ka jingjop namar ka jingtrei shitom ka jong phi.”
“Haba phai sha ki laiphew, sawphew snem kiba la leit, ka pass certificate kala lah ban pynioh kam sorkar hynrei ha kane ka juk ba mynta ym lah ban pyntikna hynrei da ka jingtrei minot bad wan ha ki kyrdan ba ha khmat kan pyntikna ym da kaba shu pass malu mala” ong u Bah Gavin.
Shuh shuh u la ong, Kum ka jylla bad ka ri hi baroh kawei ka kynduh jingeh bha kadei ka jingbym ioh kam ioh kam jong ki khun samla, mynta ngi im ha ka juk jong ka jingialeh ka long kaba donkam bha ba phin trei shitom ban poi sha ka thong kaba ha khmat.
“Mynta la 12 snem ngi khlem ioh shuh ia ki IAS ophisar na ka jylla,hynrei shim ia kane ka kabu bad trei shitom ban poi sha ka thong ba shisien ka sngi phin ioh ia kane ka kyrdan” ong u Bah Gavin.
U Bah Gavin u la ong ba ka Sorkar jylla ka pynshlur ia ki khun samla ba kin ieng ha la ki jong ki kjat khnang ba ka jylla kan kiew ha ka ioh ka kot bad u la bynrap ba ka NPP ka kitbok ia baroh ki samla ba kin kiew shaphrang ha ka jingthmu ka jong ki.
 kaba dei ka shnat treikam ki samla jong ka National People Party (NPP), kum shi bynta ban pynshlur shuh shuh ia ki samla pule, hynne ka sngi Saitjain kala pynkup burom ia ki samla kiba la pass bha ia ka SSLC bad HSSLC jong u snem 2024-2025.){kind=link}