Nongpoh, Nohprah 16 : U MLA ka Nongpoh Constituency Bah Mayralborn Syiem, hynne ka sngi thohdieng, ula ai ia ka khusnam sha ki 3 tylli ki Village Organisation (VO), kaba dei ka synjuk jong ki Self Help Group (SHG) ka Constituency, kiba la treikam bha bad ai ka jingshakri ba kynsai sha ka imlang sahlang ha ka constituency.
Kine ki lai tylli ki Village Organisation ki dei kiba shah jied napdeng ki 206 tylli kiba don hapoh ka Constituency bad ia kane ka khusnam la aiti ha ka jingialang kaba la pynlong ha Iingdorbar ka shnong Nongpoh Proper.
Kane ka jingaikhusnam ka dei ka jingpynurlong ia ka jingkular jong une u MLA ba un ai ia ka khusnam sha kino kino ki VO kiba treikam bha bad kiba wan shakhmat ha ka jingshakri ia u paidbah.
Napdeng kine ki VO, ka Kynthuplang VO jong ka Shnong Mawlong kaba hap hapoh ka Umling C&RD Block kala shah jied kum ka VO ba kynsai tam bad la bud da ka Iasnohktilang VO jong ka Shnong Mawphrew kaba wan ba-ar bad ka Iasnohkti lang VO jong ka Shnong Niangbari Lum kum ka VO kaba wan balai.
Ia kine ki lai tylli ki VO la ai da ki momento ha ryngkat ka song pisa bala sei na ka pla jong une u MLA ka Nongpoh.
Haba kren ha ka jingialang, u MLA u la ong, “Ngi ladei ban kynmaw burom ia ki Village Organization da kaba ai khusnam sha ki kat kum ki kam ba ki la leh kum ba ngi ju pynlong ia kiwei kiwei ki bynta, bad ka jingithuh iaki kam jong ki kalong kaba kongsan bha”.
U la ong ruh kane ka jingai khusnam ka long kum shibynta ban kitbok kitwriang bad ban pynshlur ia ki VO ba kim long kiba shah ieh khunswet haka kam kaba ki trei hynrei kum u nongmihkhmat un iai don ha syndak bad ia bah ia tynrong lem iaka khia ka shon.
U la kyntu ruh ba kin dang iai bteng ban trei bha ha ki kam kum ka VO bad u la ai mynsiem ruh ia kiwei pat ki VO ki bym shem la mih kyrteng ba kin nym duh mynsiem bad ba kin nangiai trei bha khnang ba kin kynjoh sha ka thong Jong ka jingjop.
Ha kane ka sngi ai khusnam la iadonlang u bah Balajied Rani MDC ka Nongpoh, bah RB Shadap President ka Ribhoi Dorbar, bah Bull Lyngdoh Assistant Rangbah Shnong ka Nongpoh, Ki Nongtrei ka Umling C&RD Block, Ki Dkhot Jong ki VO bapher Bapher ki Longkmie Longkpa, ki khun Samla bad kiwei kiwei.
