Shillong, Naitung 31: Hynne ka sngi Palei, la pynlong ia ka Sampoornata Abhiyaan Samman Samaroh ha Durbar Hall, ha kaba u Lat ka jylla u C.H. Vijayashankar, ula shim ia ka bynta kum u kongsan.
Ha kane ka jingialang la ia don lang ryngkat u Bah D.P.Wahlang uba dei u Chief Secretary jong ka jylla, u Dr. Joram Beda u Commissioner bad Secretary ka tnad Planning, Investment Promotion and Sustainable Development bad kiwei kiwei ki riew rangbah.
Ha kane ka jingïalang la rakhe ïa ki jingjop jong ka Meghalaya ha ka Sampoornata Abhiyaan bad ia kane ka sienjam la sdang da ka NITI Aayog naduh u Naitung 2024 haduh u Nailur 2024.
Kane ka campaign ka pynleit jingmut halor ka jingjop ha ki hynriew tylli ki bynta ba kongsan jong ka Key Performance Indicator (KPI) hapoh ka Aspirational Districts and Aspirational Blocks Programme da kaba thew ia ki dong ki thain kiba dang kham duna ha ki lad kam pynroi ha kylleng ka ri.
U Lat ka jylla ula ai khublei ia ka Ri-Bhoi district kaba la ioh jingjop ha ki lai tylli ki bynta ba kongsan kum ha ka lah ban pyndap ban pynbiang ia ki jingbam na ka bynta ki kynthei ba-ar met, ka jingsam ia ki Soil Health Cards bad ka jinglah ban pynpoi biang por ia ki kot pule sha ki khynnah skul.
Ula ïaroh ruh ïa ka Amlarem, Resubelpara bad Umling Block namar ka jinglah ban sam pura ïa ka Soil Health Card bad kane kala kyntiew ia ka rep ka riang ban pynbha ia ka ioh ka kot jong ki nongrep.
U Lat ka jylla ula ïaroh ïa ka jingtrei shitom jong ki Deputy Commissioner, ki Block Development Officer, ki nongtrei ba hakhmat eh bad ki nongshimbynta ha ka imlang sahlang kiba la aiti lut bad ka jingïatreilang jongki kaba la pynlong ïa ban ioh ia ka jingjop.
