Shillong, Risaw 03: Ki MDC barim jong ka Khasi Hills Autonomous District Council (KHADC) hynne ka sngi kila ai jingkhublei iaka Executive Committee (EC) ba ialam da u Chief Executive Member (CEM) u bah Pyniaid Sing Syiem halor ka rai bala shim ban pyllait noh iaka bai bam tymmen (Pension) jong ki.
Haba kren sha ki lad pathai khubor u MDC barim ka Sohryngkham u bah Handle Mukhim ula ong ba ka EC ha u snem 2002 kala wanrah iaka Bill bai bam tymmen ki MDC bala shongthait bad ha u snem 2006 kane ka Bill la ioh jingmynjur na u Lat ka jylla hynrei iaka bai bam khlem pyllait.
U bah Handle ula iathuh ba kane ka jingbym ioh bai bam kala pynlong iaki MDC barim ban ujor shaka ingkashari bad dei ha u snem 2009 ka Meghalaya High Court kala bthah iaka KHADC ban pyntreikam iaka Bill ban siew bai bam tymmen iaki MDC bala shongthait.
Hynrei haduh u snem 2012 ka KHADC kala shah pynduh biang ka bai bam tymmen bad naka liang ki MDC kila ujor biang shaka Meghalaya High Court bad haduh mynta ka district council ka dang dep pyllait tang 50% ka bai bam tymmen” la ong u bah handle.
U bah Handle ula ong ba kum ki MDC bala shongthait ki dap daka jingsngewnguh ruh ia u CEM barim u bah Titosstarwell Chyne uba la shim khia ban sdang pyllait iaka bai tymmen kaba dang sah jong ki MDC.
Ula ong ba naka liang ki MDC barim kim kwah ban iasniew bad ka KHADC bad dei namar kane haka jingiakynduh bad u CEM ba mynta u bah Pyniaid Sing Syiem kila dawa ban pyllait iaka bai bam tymmen daka kynja Installment bad katkum ka jingdon pisa ka district council.
“Kum ki MDC bala shongthait, Ngi ai khublei iaka EC kaba mynta namar kala kular ban sa pyllait noh baroh ka 50% ka bai bam tymmen jong ki MDC bala shongthait” ula ong.
