Nongpoh, Naiwieng 18: Ka Dorbar Shnong jong ka Shnong Saiden hynne ka sngi Thohdieng, ka la ai ka jingiaroh bad kitbok kitrwiang ia ka tnad pulit ka Ri Bhoi District kiba la treishitom ban pynduh jait ia ka jingshalan ia u drok beain sha Meghalaya.
Kane ka jingai khublei ka dei ruh halor ka jingioh kurup ki Pulit ia u drok ba shongdor haduh T. 14 klur na kawei ka bos Manipur hynne ka step phyrngap na Saiden, kaba thmu pynpoi ia une u jingdih buaid sha Nongbah Shillong.
U Bah Successful Lyngdoh, Rangbah Shnong ka Shnong Saiden haba kren bad u Nongthoh Khubor, u la ong, ba ka Dorbar Shnong ka dap da ka jingsngeqnguh bad sngewkmen haba ai khublei kyrpang ia ka jingtreishitom ki bor pulit ka district bad miet bad sngi ban rad dyngkhong ia ka jingpynpoi ia u drok beain sha kane ka jylla bad ruh ha kane ka district hi baroh kawei.
U la ong ruh, ba katba nang mih ki sngi la nang sakhi ba ka dong ka thain ha Nongpoh bad kiwei kiwei, ka la nang jyllei bha ka jingpynpoi ia u drok beain da ki briew ki bym lah ban ithuh durkhmat kaba la buh jingma shikatdei ia ki khun samla ha kane ka district bad ka jylla hi baroh kawei.
“Hynrei ka jingtreishitom ki pulit ban nang iai kem bad ban kurup ia u drok beain ka la ai mynsiem pat ia ki nongialam shnong ha ki shnong bapher bapher bad ki kyrmen skhem ruh ba ki Pulit kin lah ban pynduh jait noh ia u ne u jingdih buaid na kane ka jylla hi baroh kawei” kala pynpaw.
U Bah Lyngdoh u la pynpaw, ba kum kawei na ki Dorbar Shnong ha ka thain Nongpoh kan ai ka jingiatreilang kaba shitrhem bad ki bor pulit halor kane ka sienjam ban pynduhjait ia u drok na kane ka dong ka thain da kaba kyrpad ruh ia kiwei kiwei ki dorbar shnong ba kin mih shakhmat ban ai ka jingiatreilang bad ki bor pulit ban lah syndon ban pynurlong noh ia ka jingpynduh jaid ia u ne u jaid jingdih buaid u lah ban pynjot pynpra ia ka lawei jong ki khun samla.
