Shillong, Jymmang 08: Ka Education Cell jong ka Khasi Students’ Union (KSU) hynne ka sngi, kala ai khublei ia ki samla pule kiba la wan shakhmat ha ka HSSLC Science bad Commerce.
U Samla Pynkmenlang Sanmiet, Chairman ka Education Cell jongka KSU ula pynpaw ba ka seng ka ai khublei ia baroh ki paradoh para snam na kylleng ka Ri Khasi bad ka ai khublei kyrpang ruh ia ki samla kiba la ïoh ban kheit ïa u soh ka jingjop da kaba wan shakhmat bha ha ki kyrdan bad sobjeck ba ki pule.
“Ka jingïoh ka jong phi ban kheit ïa u soh ba thiang ha kane ka kynti ka long ka jingkmen ym tang ïa phi shimet hynrei ïa ka ïing ka sem, ka shnong ka thaw, ka Ri bad ka jaitbynriew hi baroh kawei” ula pynpaw ha ka kyrwoh.
Ka Seng ka sngew sarong shikatdei eh ban ïohi ba ki khun samla ka jaitbynriew ki wan shakhmat ha ka jingpule ka jong ki, namar ka jingnang jingstad, ka jingtip jingshemphang, ka dei ka atiar ba khraw ban ïada, ban pynneh pynsah bad ban kyntiew ïa ka Ri bad jaitbynriew ha baroh ki liang.
Ka seng ka kitbok kitrwiang ruh ia kito ki samla ki bym shem la poi sha ka thong ha kane ka kynti, ba kin ym duh jingkyrmen, pynban ba kin nang ïai trei shitom ba kin lah ban leh bha ha kawei pat ka kynti bad ba kin kynmaw ba ka jingshah rem kam dei ka lad ba khatduh hynrei kan long u mawjam sha ka thong jong ka jingjop.
Ka Seng kitbok kitrwiang ruh ia ki samla kiba ap ban ïoh ïa ka Result HSSLC Arts bad SSLC ba kin ïoh ban kheit ïa u soh ka jingkmen u ban long ka jingsarong ïa ka Ri bad ka jaitbynriew hi baroh kawei.
