Shillong, Aug 9: Ka Ministry of Finance ka sorkar India kala ai jingmynjur ia ka song pisa ba T. 2,000 klur na ka bynta ban shna ïa ki surok bad ki jingtei lyngba ka Second Phase jong ka Meghalaya Integrated Transport Project (MITP), kaba la tip kum ka Meghalaya Economic Growth Accelerator (MEGA) Corridor Project.
Kane ka jingpyllait song pisa ba thymmai ka dei ka jingmih na ka jingpyntreikam kaba seisoh ia ka wat kaba Nyngkong jong ka MITP.
U Myntri Rangbah ka jylla Conrad K Sangma, ha ka jingiakynduh bad ka Myntri Pla Tyngka ka sorkar pdeng, ka Nirmala Sitharaman, myn ha ka 24 tarik u Nailar 2024, ula ai jingbatai halor ka projek bad ula pan shuh shuh ia ka jingkyrshan pisa.
Ha ka First Phase ne wat ba nyngkong jong ka MITP la pyntreikam da ka jingkyrshan pisa kaba kot T.880 klur na ka World Bank. Hapoh katei ka projek la tei ia ki katto katne ki surok kiba kongsan kum ka Bajendoba-Resubelpara-Mendipathar-Damra, Shillong–Diengpasoh bad Pasyih–Garampani. Ka jingpyntreikam kaba seisoh ia kine ki projek kala ioh iaka jingiaroh na ka World Bank bad na ka Ministry ka Tnad Finance jong ka ri.
Hapoh ka Wat Ba-ar jong ka MITP (MEGA Corridor) Project, yn tei ia palat 300 Km ki surok double Lane kiba lah ban kyrda ia ka jinglong ka suiñbneng, kiban pyniasoh ia ka Shillong, Tura, Jowai bad Dawki.
La pynleit jingmut kyrpang ruh ia ki surok ha sor kiba pyniasoh ia ka New Shillong Administrative City bad ka New Shillong Knowledge City, da kaba pynkylla ia ka nongbah Shillong kum ka jaka ka roi ka par ha ka thaiñ.
Nalor kata, yn pynroi ruh ia ki jingdonkam bapher bapher kum ki Industrial Park, Warehouses, Agro-Processing Center bad ki iew ki hat.
“Haba kyllum lang, kine ki jingdon jingem kin pynsted ïa ka ioh ka kot bad kan nang pynkhlain ia ki kam khaii pateng ha ki jaka kiba don sha jngai, kan pynroi ruh ïa ka jingpynïasoh ia ki surok kaba pura bad kaba khlem jingeh ha baroh kawei ka Jylla,” ong ka kyrwoh na u Commissioner bad Secretary, Planning, Investment Promotion & Sustainable Development jong ka Sorkar Jylla.
Kine ki jingshimkhia lyngba ka projek MEGA Corridor, ryngkat bad ki projek kiba dang ïaid shakhmat, kum ka Shillong Dawki Road (NH 106 & 206), ka Tura Dalu Road (NH 217), ka Phulbari – Goeragre Road (NH 127B), ka jingkieng Dhubro-Phulbari, kan plie ïa ki lad ki lynti ia ka Jylla ha kaban pynkylla kum ka jaka pdeng bad ka ioh ka kot kaba khlain ha ka thain, kaban pynurlong ruh iaka ioh ka kot kaba USD 10 Billion hapoh u snem 2028.
, kaba la tip kum ka Meghalaya Economic Growth Accelerator (MEGA) Corridor Project.){kind=link}