Shillong, Naiwieng 20: Ka Shillong College ryngkat bad ka PRIME Meghalaya kila pynlong ia ka Annual Entrepreneurial Meet 2023 bad la ai jingithuh kyrpang ia kito kiba la pyndep iaki jinghikai ban seng kam lajong.
Mynta u snem namar ka jingdap 13 snem jong ka EDC, Shillong College, la pynlong iaka Annual Entrepreneurial Meet 2023 ha ka 14 tarik u Naiwieng ryngkat ka jingiatreilang bad ka PRIME, Meghalaya ban ithuh bad ban plie lad ia ki katto katne ki nongseng kam lajong kiba la iaid shakhmat da ka jingjop ban seng ia ki kam lajong.
Ha ki 13 snem kiba la leit, ka Entrepreneurship Development Cell (EDC) jongka Shillong College kala saindur ia bun ngut ki nongsengkam lajong kiba dei ki trai jylla ha kabaka la pynlong iaka jingai jinghikai kaba 3 bnai na ka bynta ki riewshimet ba kin bteng iaka jingangnud ka jongki ban long kum ki nongseng kam lajong.
U Bah D.P. Wahlang, Chief Secretary ka jylla ula plie ia katei ka prokram kum u kongsan ha ryngkat ka jingdonlang ka Kong Isawanda Laloo ka Executive Director, MBMA & PRIME, Meghalaya kum ka kongsan symbud ha kaba la iadonlang Dr. E. Kharkongor, Principal ka Shillong College, ki nonghikai bad kiwei kiwei.
Phra ngut ki nongseng kam lajong kiba la pyndep ia katei ka jinghikai, kila shah pynkup burom ryngkat lang bad ki dkhot nongseng jong katei ka Cell.
Ia ka Website earthmovingsolutions.in, kaba dei ka jingsdang jong u nongseng kam lajong u Nishant Suchiang la pyllait paidbah da u Kongsan bad symbud kongsan.
Ki khana jingjop jong ki samla kala ai mynsiem bad pynshlur ia kiwei pat ba kin bteng bad ban wanrah iaka jingkylla naka bynta kito ki samla kiba la wan ban iashimbynta haka prokram.
