Shillong, Aug 29: U Rangbah shnong ka shnong Mawlyndep Ri-bhoi District u bah Jinu Kharbuki ula dawa naka sorkar jylla ban pynmih daka hukum ban bthah ia baroh ki College ban pyntreikam noh iaka National Education Policy (NEP) hapoh ka jylla baroh kawei.
Haba kren sha ki lad pathai khubor u bah Jinu ula ong “Kum u kpa ki khun nga dap daka jingsngewdiaw ban iohi ka jingiashrut hapdeng ka Meghalaya College Teachers Association (MCTA) bad u Vice Chancellor (VC) ka NEHU haba iadei bad ka jingpyntreikam iaka NEP namar kane ka buh jingeh iaki samla pule kiba la dep ban shim Admission ha ki College bapher bapher”.
U bah Jinu ula ong ba ki don bun ngut ki samla pule naka shnong Mawlyndep bad kiwei ki shnong marjan ba la dep ban shim Admission hynrei mynta la shi bnai tam ki samla pule kim pat sdang iaki Class jong ka First Semester namar ki College ki dang sah haka um dum, kata ban shim Class katkum ka Course barim ne katkum ka juk thymma lyngba ka NEP.
Ula ong ba ka NEP kan long ka jingmyntoi iaki khun samla namar kan iarap ban kham pyniar iaka pule puthi bad kane ka Policy kan iarap ban kyntiew iaka pule puthi hapoh ka jylla bad ka ri baroh kawei.
“Hoid haka jingsdang ban pyntreikam iaka NEP kan don ka jingeh hangne hangtei hynrei ngi kyrmen ba hadien ha bud ki College ruh kin sa lah ban pyntreikam bha iaka NEP ha Meghalaya bad dei namar nga dawa naka sorkar ban pynmih daka hukum ban bthah ia baroh ki College ban pyntreikam noh iaka NEP naka bynta ka jingmyntoi ki samla pule” la ong u bah Jinu.
U bah Jinu ula kyntu ruh iaka sorkar jylla ba kam dei ban shong khli kti hynrei kadei ban kner ki lad jingiarap sha ki College kiba shem jingeh ban pyntreikam iaka NEP bad ula kyntu ruh iaka MCTA bad ia u VC ka NEHU ban iakren pynbeit noh ia ki jingiapher jingmut haba iadei bad ka NEP.
Pule lang ia kane: Pynthikna u Nongaibuit ka Sorkar ba ka SSA kan ym pat kut ha u 2026
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
