Shillong Jylliew 24: U Myntri Rangbah ka Jylla u Conrad K Sangma hynne ka sngi ula banjur ia ka jingkongsan ban don ia ka jingstad ban sngewthuh iala ka jong ka jingsngew bad ia ka jingsngew jong kiwei ne Emotional Intelligence, jingshemphang bad ki sienjam kiba iajan bad ki paidbah ha ka kam ai jingshakri ia ki paidbah, haba ai jingkren ha ka Valedictory Programme jongka Induction Training Programme ia ki MCS Batch jongu snem 2025.
U Myntri Rangbah ula kyntu ia kine ki ophisar kiba dang shu shimti thymmai ia ka kam ba kin trei da ka jingthmu bad jingsngewrit, da kaba buh hakhmat eh ia ka jingdonkam jong ki paidbah kaba ki ai jingshakri.
“Ka jingai jingshakri ia ki paidbah ka don ia ka jingkitkhlieh kaba long kongsan bha. Ha ka lynti iaid ban pyndep ia ka kam bad ia ka thong, ngi dei ban kynmaw ba ka mat jong ka jingshimkhia ia ka kam kadei ban long nyngkong eh na ka bynta ki paidbah” ula ong.
Haba pynpaw ia ka jingkongsan jong ka Emotional Intelligence, u Myntri Rangbah ula ong ba ka “Emotional Intelligence’ ka long kaba kongsan bha ha ka kam. Phi hap ban tip kumno ban leh haba mih ki jingeh”.
Ula kyntu ia ki ophisar ba kin long kiba iai shah bad kiba kloi ban sngap ia ka jingsngewkhia jong ki paidbah bad ban jur ba ka jingiasyllok bad ki briew hashwa ban shim ia kino kino ki rai ka long kaba donkam bha.
Haba kren halor ka jingkongsan ban iasyllok, ula ong “90% nga iohi ia ki jingeh kiba mih namar ba ngi la jam shakhmat khlem ka jingiasyllok bad ki paidbah. Kumta ka long kaba donkam ba hashwa ba ngin shim ia ka rai, ngi dei ban iakren bad ban pynbeit bad u paidbah”.
Ula banjur ia ka jingkongsan ban don ia ka jingiatreilang bad ka jingiasyllok na ka bynta ka jingiaid ryntih ha ka jingai jingshakri ha ka kam sorkar.
“Trei da ka jingthmu bad jingsngewrit ban shakri ia ka imlang sahlang. Buh hakhmat ia ka Emotional Intelligence bad ka rukom treikam kaba phaikhmat sha ki paidbah. Long kiba iai shah bad kiba kloi ban sngap ia ka jingsngewkhia jong ki paidbah” ula ong.
