Shillong, Risaw 12 : Ka United Democratic Party (UDP) kala ai jingmut ia u Chief Adviser bad Symbud Myntri Rangbah barim ka Jylla Bah Bindo M Lanong ban mih iakhun na East Shillong Constituency ha ka elekshon MLA 2023 ban long ha Jylla.
“Ngi la dep ai jingmut ia u (Bindo) ban iakhun na East Shillong bad u don lad bha na kane ka Constituency. Ka rai mynta ka shong ha u” ong u Nongialam ka UDP uba ka kyrpad ban nym pynmih kyrteng.
Kat kum ka jingong jong u, ka ticket jong ka UDP kan leit sha u Bah Bindo lada u iakhun na East Shillong, kaba la mihkhmat mynta da ka MLA ba shah sospon ka Congress Kong Ampareen Lyngdoh.
Hynrei une u Nongialam ka UDP ula ong ba u Chief Adviser u kwah eh ban iakhun na Nongkrem, ka bym dei satia ka Constituency ba u mihkhmat.
“Ngim don jingtip mano ba tyrwa ia ka kyrteng jong u naba ngi don la ka jong ka Cirlce ha Mawprem. Kat kum ka jingtip jong nga, u khlem iaid lyngba ka Circle (Kaba dei ka lynti ka ban phah kyrteng sha ka District) ” ula ong.
Lah ban kdew hangne ba ka Nongkrem Circle jong ka UDP kala dei ban phah ia ka kyrteng jong u MLA ba mynta u Bah Lambor Malngiang ban ai ia ka ticket jong ka party.
Une u Nongialam ka UDP ula ong ba tang namar u Bah Bindo u dei uwei na ki nongseng ia ka party, kane kam mut ba u lah ban leh katba u mon.
“Ki don na ki dkhot ki bym sngewthuh ia ka nongrim jong ka party bad kila kyrpad ba ia ka ticket dei ban ai sha u hynrei haba la pynsngewthuh ia ki, ki ruh kila mynjur ba u Bah Bindo u dei ban rai leit biang sha East Shillong” ula ong.
