Shillong Nohprah 20: U Working President, Meghalaya State Olympics Association (MSOA) u Bah John Kharshiing hynne ka sngi Balang ula leit ban ai ia ki jingai jingmut haka Meghalaya Education Commision ban pynrung lang ia ki kam ialehkai hapoh ka pule ka dangle ha ki skul.
U Bah John ula pyntip ba ha kane ka jingialang kaba la long ha DERT Annexure Conference Hall, Shillong ,ula ai ia ki jingpynkhreh bad ki jingtip ki jongu ha kaba iadei bad ka jingpyniaid lang iaka pule puthi bad ki kam ialehkai bad kane ka jingleit ai jingmut ka jongu ka long ban kyrshan lem iaka Commission kaba don ha ka lynti ban thaw ia ki jingbthah ban don ka jingiadei kaba iajan bha hapdeng ka pule puthi bad ki kam ialehkai bad kumno kine baroh artylli kin lah ban noh synniang ha kaban tei ia ka lawei jong ki khynnah kiba dang rit ha ka rta.
Ula ong ba ha katei ka kot ai jingbatai ka jong u, ka don 70 sla kaba la ai kyrteng “Education and Sports: A Balanced Approach”.
U Bah John ula pynpaw ba ka long kaba kongsan ia ki kam ialehkai na ka bynta ban tei ia ka met, ka bor pyrkhat bad ka jingiadei parabriew bad ula pynpaw ruh halor ka jingdon jong ka Meghalaya Sports Policy 2019 bad Meghalaya Youth Policy 2021 bad ki mat kiba kongsan ha kine ki policy ka long ban kyntiew ia ka bha ka miat jong ki nongialehkai bad ki samla.
U Working President ka MSOA ula aiti ia katei ka jingpynkhreh ka jong u bad iaka Meghalaya Sports Policy 2019 sha u Chairperson jong ka Commission, Professor S M Sungoh ha ryngkat ka jingdon lang jong kiwei kiwei ki dkhot jong ka Commission.
Ula ai ruh ia ka jingtyrwa sha ka Meghalaya Education Commission kiba kynthup ia ka mapping bad ban kyntiew bad pynbha iaki jaka ialehkai, ka jingiashimbynta ha ki Talent Identification, ban thung da ka Kontrak ia ki Coach kiba tbit, Physical Education Teachers na ka bynta ki 15000 tylli ki skul ha Meghalaya, Sports Specialist & Professionals, Sports Psychologist, Physiotherapist, Masuers, Sports Hostels, Olympians na ka bynta ka Sports Science Center, Sports Schools ha man la ki District, ka jingbhah kam kyrpang ia kiba ioh khur takma, ban kyntiew iaka song tyngka jong kiba ioh khusnam, ban pynkylla noh iaka Sports University Act bad kiwei kiwei.
Ula pyntip ba na ka liang jong u Chairperson ka Meghalaya Education Commission ula ai khublei iaka MSOA halor kane ka jingpynkhreh bad ki jingai jingmut kiba kyrpang ia kaba ka Commission kan sa khmih ban bishar bniah na ka bynta ban ai ia ka jingmynjur khnang ba ka Commission kan ioh phah ia ki jingbthah sha ka sorkar jylla.
