Shillong, Jymmang 08 : Lai tylli ki kynhun senghalang kiba don ha ka lama jong ka Joint Action Committee (JAC) hynne ka sngi Nyngkong, kila ai ka jingkyrshan ba pura ha kaban pyntreikam iaka Stage-II jong ka Myntdu-Leshka Hydro Electric Project.
Kine ki lai tylli ki seng ki dei ka Jaintia Students’ Union (JSU), ka Jaintia Youth Federation (JYF) bad ka East Jaintia National Council (ENJC).
Ki Nongialam jong kine ki lai seng kila phah ia ka shithi bala iathoh lang sha u Chairman ka Public Hearing halor ka MLHEP-State-II bad ong “Ka JAC ki kynhun sengbhalang ki kyrshan pura ia ka hydro electric project ban dang pyntrei, ka ban ai jingmyntoi shi katdei eh ia ka Jylla Meghalaya baroh kawei”.
Hynrei ka JAC kala buh pat ia ki katto katne ki jingai jingmut sah ka Sorkar bad ki bor pyntreikam haba iadei bad ka jingtrei ia ka kam bad ka project development jong ka MLHEP Stage-II.
“Ngi kyntu ia ki bor ba pyntreikam bad ia ka Sorkar Jylla ban bujli ia ki afforestation land na West Khasi Hills District sha Jaintia Hills District bad ka long kaba suk ban wad ia ka jaka ba iahap ban pynrben ia ki khlaw hapoh kine ki artylli ki District ka Jaintia Hills naba ngi don da ki hectare ki jaka ban tyrwa ha kaban thungdieng hapoh kine ki ar District” ong ka shithi.
Kala pynpaw ruh “Ka JAC ka kwah ban kyrpad ia ka Sorkar Jylla bad ki bor pyntreikam ban sdang nyngkong da kaba pynryng kam ia ki trai shnong ha ka skilled/unskilled staff (nongtrei bala shemphang ia ka kam bad ki bym pat nang) ha kano kano ka kam ba iahap bad ban buh hakhmat ha ka jingpynrung kam ia ki samla trai shnong kiba khlem kam khlem jam ha kine ki jait kam (skilled/unskilled) ban trei ha kane ka project”.
Na ka bynta ki nongtrei technical, ngi kyrpad ban buh hakhmat ia ki samla trai shnong kiba la don ia ka kyrdan bad lada kim don, ka bor ba pyntrei ia ka project ka lah ban wanrah na shabar ha ryngkat ki kot ki sla kiba biang bad ban pan jing bit ruh da kaba aplai ia ki labour licence bad ki syrnot na ki bor ba dei khmih”.
Ka JAC ka ong ba kane ka project ka dei ban ai jingmyntoi eh ia ki jaka ka thainbad ia ki nongshongshnong na ki artylli ki District ka West bad East Jaintia Hills District.
“Ngi kyrpad ia ka Sorkar bad ia ka bor ba pyntrei ia ka project ban kynthup lang ia ka shnong Borghat hapoh ka Local Area Development naba ka lah ban long kawei pat ka shnong ka ban shah ktah d aka jingshna dam hadien habud” kala bynrap.
