Shillong, Naitung 12: U MLA ka Mawlai Konstitwensi u Bah Process T Sawkmie u la nohjingiarap da ka song pisa sha ki nongialehkai Karate ka All Meghalaya Karatedo Association (AMKA), ban ia don bynta lang ha ka jingleit iakhun ka jong ki sha Chattisgarh.
Kitei ki khynnah karate kiba ioh jingiarap ki kynthup ia ka Barisha Kharbani, ka Rebecca Nongspung bad u Francis Marbaniang.
Katkum kine ki khynnah, ki la iathuh ba kane ka jingialehkai kan sdang ha ka 15 bad 16 tarik u Naitung, 2022.
Haba kren sha u nongthoh khubor ki la pynpaw ba ki la pynkhreh bha bad ka thong jong ki ha ka long ban ioh khur takma ha kane ka rynsan iakhun.
Haba ia dei bad kane ka jingleit jong ki u Bah PT Sawkmie u la kitbok kitrwiang ia ki ba kin ioh khur ia ka jingjop ban ioh khur takma bad ban wanrah nam bad burom ia ka Mawlai, kumjuh ia ka jylla hi baroh kawei.
Ia katei ka song pisa u la aiti sha ki ha ophis treikam jong u ha Mawlai Nongpdeng ha ka jingdon ryngkat u bah Homer Kharkongor, u president ka UDP Mawlai Circle.
