Shillong, Nohprah 16: U Myntri ka Sorkar Jylla u Bah Sanbor Shullai hynne ka sngi Baar ula leit ban ai jingiarap T.1 Lak ia ka Ferrando Transit Home cum Children Orphanage Home kaba don ha Mawdatbaki Mawlai, Shillong, ha ka jingrakhe lypa ia ka Khristmas bad Snem Thymmai ha katei ka jaka kaba don 87 ngut ki khynnah.
Haba kren u Bah Shullai ula iaroh ia ki dkhot bad ki nongtrei jong kane ka jaka, kiba la pynlong ia katei ka jingrakhe bad ula banjur ia ka jingkongsan ban shakri ia ki parabriew, da kaba sot na ka ktien bakhuid, “Ka jingshakri ia ki briew kadei ka jingshakri ia u Blei”.
Haba aiti ia ka song jingiarap kaba T.1 Lak, u Myntri ula ong, “Nga dap da ka jingkmen ban iadonbynta bad kane ka khyllipmat jong ka jingkmen bad jingsngewbha”.
Ha kane ka sngi la ioh ruh ia ka jingpyninam na ki khynnah, kynthup ka jingrwai ia ki jingrwai Khristmas, ka jingak ia ka drama lyngkot ha kaba iadei bad ka jingkha ia u trai Jisu Khrist bad kiwei kiwei ki jingiakob.
Hashwa kane, ka Sister Dalina Francis G kala pdiang sngewbha ia baroh kiba la wan sha kane ka jingrakhe katba ka Naphi Laso, Deputy Chief Legal Aids Reform Council kala ai jingkren.
