Nongstoiñ, Nohprah 6: Ka seng Hynñiewtrep Youth Council ha ka jingïalam jong u samla Blastarland Sohmad u General Secretary jong ka Nongtrai Circle, ha ka sngi nyngkong ka la leit ai jingïarap ïa kawei ka longing jong ka kong Trisia Ïawphniaw, ba suba shah thang dusmon ha ka shnong Umkait.
Ka HYC ka ïathuh ba ïa katei ka jingjia la kynnoh ba la thang da u lok barim jong ka kong Trisia Bah Tailan Sangriang uba dei naka shnong Riangkang. Ka daw la ong ba ka dei na ka jingïa shong khlad la kumba mynta la lai bnai ei ei.
Ka seng ka pynpaw ka jingsngewkhia bad pynrem jur ïa u ne u briew, u ba la leh ïa kum kine ki jait kam ki bym ïahap shuh bad ka imlang ka sahlang, ha ka long briew man briew kaba pyntieng pynsmiej bad pynsuhjer ïa ki briew, khamtam ha ka dong ka thaiñ hi baroh kawei.
Ka seng ka kyrpad ïa ki briew jong ka aiñ ba kin pynshitom bad ai ka jingsneng ka ba tyngeh, khnang ba kan ym jia shuh ïa kum kine ki jait kam. Kumba la ïoh jingtip ba mynta la ïoh kem ïa utei u rangbah u ba la suba ba u la leh ïa katei ka kam.
