Shillong Nailar 25: Ka ophis jong ka District Tuberculosis Officer, East Khasi Hills District hynne ka sngi Thohdieng, kala pynlong iaka Training bad Sensitization Programme ia ki nongai dawai kynbat na ka bynta ban rat dyngkhong iaka jingpang TB ha Sohra Community Health Centre, Shella Bholaganj Block.
Ka Dr. B. Shanpru, District Tuberculosis Officer, East Khasi Hills District, Shillong kala iathuh ba ka jingpang TB kadei kaba la ioh lyngba ka Mycobacterium Tuberculosis bad kane ka jingpang kadei kaba ioh lyngba ka lyer ne ka Airborne Disease bad ki don ar jait ki jingpang TB ka Pulmonary bad ka Extra- Pulmonary.
Kala ai jingbatai shaphang ki dak ki shin jong ka jingioh iaka jingpang TB bad kala pynshlur ia ki nongai dawai kynbat ba kin khmih bniah bha ia ki nongpang kiba don ia ki dak ki shin kum ka jyrhoh bad ka jingshit kaba la don ar taiew tam ne duna, ka jinghiar ka jingkhia ha ka met ka phad, ka jingsyep ha ka por mynmiet bad kumta ter ter.
Ka Dr Shanpru kala kyntu ia ki nongiashimbynta ba ia kum kitei ki briew kiba don ia kitei ki dak ki shin dei ban bthah ia ki ban leit phah sumar mardor ha ki jaka sumar ban leh iaka TB Testing bad ban ioh iaka jingsumar.
Kala iathuh ba ki don bun jait ki Test kiba leh ban lap iaka jingpang TB kum TRUENAAT, CBNAAT, Sputum Microscopy bad kine kidei kiba ioh ei ha baroh ki TB Testing Units.
Kala pynshai ruh ba ia ka jingpang TB lah ban pynkoit lada ki nongpang ki dih thikna bad dih pyndep ia ki dawai dashin abd kala kyntu ia ki nongaidawai kynbat ban ai ka jingiatreilang bad ka sorkar khnang ba yn lah ban pynduhjait iaka jingpang TB na kane ka ri.
