Shillong, Jylliew 20 : U Myntri Rangbah ka Jylla Conrad K Sangma hynne ka sngi Palei, ula lum ia ka jingalang ban iamir jingmut halor ka jingpynwandur bad pynitynnad ia ka thain Umiam, ka ban kynthup mynta sa 300 acre ka jaka ban pynlong kum ka Tourist Hub bad ban shna ia ka jaka pynkamai helicopter.
Ia kane ka jaka la ai da ka Tnad Forest ban kyntiew ia ka kam jngohkai pyrthei hapoh ka thain.
Haba kren sha ki lad pathai khubor hadien ka jingialang, ula ong “Kane ka dei ka project ba thrang bha khnang ban pyniar ia ka MTDC, wanrah kham bun ki lad jingshakri, ki jaka pynbyrngia bad ban pynbun ia ki jaka sah na kaei kaba don mynta hapoh ka Orchid Lake Resort”.
Ula pyntip ba ka tnad Forest kala mynjur ban ai ia ka jaka ba 300 acre ha kaban kyntiew ia ka kam jngohkai hapoh ka thain. “Ngi kwah ba ka Umiam kan dei ka jaka ba khring bha ia ki nongshang suwari, ym tang ha Meghalaya hynrei ha ka thain Shatei Lam Mihngi baroh kawei” ula bynrap.
Haba kren halor ki kam ban pyntrei, u Bah Paul ula pyntip ba kan don shibun ki jingpynbyrngia ia ki nongshang kai pyrthei khamtam ka water sports. “Kan don ruh ka jaka iaid kai ha Nehru Park, ki jaka ialehkai ia ki Khynnah, ki adventure sports bad kiwei kiwei” ula ong.
Haba kren halor ka jingjaboh jong ka pung Umiam, u Bah Paul ula kular ba ka jingpynkhuid ia ka wah Umiam ka dei kaba kongsan bha ha kane ka jingthmu. “Ngi don jingthmu ban pynkhuid ia ka pung Umiam. Ka Tnad Power kala ioh ia ka bynta ban pynkhuid ia ka pung, ka ban sa sdang shen” ula ong haba pyntip “La khmih lynti ba ka jingpynkhuid kan sa sdang hapoh ka hynriew bnai”.
Haba kynthoh halor ka hukum ka Iingkashari Meghalaya High Court ba khang ban tei jingtei hajan ka pung Umiam, u Bah Paul ula pynthikna ba ki kam ki ban sa pyntrei kin long sha ki jaka lum ym shajan jong ka Pung. “Ngin sa ioh 300 acre ka jaka kaba kham pajih na ka pung” ula batai.
U Bah Paul ula pyntip ruh ia ka jingthmu ban wanrah ia ka jaka pynkamai helicopter ha Umiam ka ban pyniasoh bad kiwei ki jaka jngohkai ki ba don ha Jylla Meghalaya.
“Kum ka nuksa, na Umiam sha New Shillong, New Shillong sha Sohra. Kane ka jingpyniasoh kan khring bha ia ki nongshangkai pyrthei ba heh spah ki ban sa pynlut kham bun, watla ka jingwan jong ki kan long kaba duna” ula pynkut.
