Shillong, Rymphang 27: Palat 2426 ngut ki briew bad ki Seng kila ioh jaka ha ka revenue land ne jaka Sorkar.
Ia kane la pyntip da u Myntri ka Tnad Revenue & Disaster Management Kyrmen Shylla haba jubab hapoh ka Dorbar Mang Tyngka hynne ka sngi Ba-ar.
U MLA ka VPP na Nongkrem ula buh jingkylli ba katno ngut ki briew na Bangladesh kila die noh ia ki jaka ha Rynjah bala ai sha ki ha ka por ba don ka thma Laitluid u snem 1971.
Une u MLA ka VPP ula pan jingtip ruh ba lada don kino kino ki jaka Sorkar bala ai sha ki MLA lane sha ki bahaiing hasem jong ki.
Halor kane, u Myntri ula pyntip ba um don jingtip satia ba ia ka jaka ka Sorkar la ai sha ki MLA lane sha ki bahaiing.
U Nongialam ka Liang Pyrshah Bah Ronnie V Lyngdoh ula pan jingtip la ki don ki jaka Sorkar kiba la shah klun beain. U ong ba ka Sorkar kala pyrshang ban lum ia ki jaka hynrei lada ki jaka Sorkar kim dei kiba shah klun, ka Sorkar kan ym donkam ban thied jaka ban pyntreikam ia ki project bapher bapher.
Haba jubab, u Myntri ula ong ba ki don katto katne ki briew kiba pyrshang ban klun bad kila leit ruh sha Iingkashari hynrei “Ngi la ieng skhem ha ka nongrimba kine ki jaka ki dei jong ka Sorkar”.
U Bah Kyrmen ula ong ba um don satia ia ki jingtip ba bniah ia ka jingkylli bala wanrah da u MLA ka VPP na Mawlai halor ka jaka khlaw bala shong da ki briew ki bym dei ki nongtrei jong ka Tnad
